Iriome: "Non creo que haxa dependencia de Gerard Valentín"

O interior dereito tinerfeño do Club Deportivo Lugo, Iriome González, asegurou este mércores en rolda de prensa que o equipo "non ten dependencia" de Gerard Valentín, un futbolista "que non vou descubrir agora, que é importante no ofensivo pero a forza do grupo está no bloque", en referencia aos resultados das últimas semanas, nas que o extremo dereito catalán apenas puido participar por diversas molestias musculares.

O cadro branquivermello visita este sábado (21.00 horas) o Heliodoro Rodríguez López para enfrontarse a un Tenerife que marcha actualmente na cuarta posición e que será unha dura pedra de toque para os de Rubén Albés. Para Iriome, o equipo tinerfeño "está a facer un bo ano, teñen bo persoal, engancharon á xente e vannos expor un partido complicado", pero engadiu que "viaxamos a Tenerife con ganas de gañar".

Sobre a traxectoria do Lugo nas últimas xornadas, Iriome pediu "que o equipo volva mostrarse forte nas súas facetas, porque se temos un partido de ritmo e intensidade, imos competir". Ademais, achacou os "altibaixos" ás "sancións e lesións, algo co que pelexamos toda a tempada" e apuntou que o equipo branquivermello "debería ter algún punto máis, pero non estamos a ter sorte".