O
A participación de Induráin e Sastre dará brillo a un evento que impulsará os Ancares como destino de referencia para afeccionados ao ciclismo durante todo o ano.
A cita constará dunha "proba raíña" de 126 quilómetros e 3.500 metros de desnivel acumulado, con saída en Pedrafita e chegada no Cebreiro, pasando por concellos como As Nogais, Becerreá, Cervantes e Navia de Suarna. A maior dureza concentrarase, sobre todo, nos últimos 90 quilómetros, con portos como o Alto de Sete Carballos, A Pintinidoira, Vilasol e o propio O Cebreiro, como puntos máis elevados.
Ademais do percorrido principal, ofrécese a posibilidade de realizar outro de medio fondo, de 100 quilómetros, cun trazado alternativo nos puntos de maior desnivel.
O exciclista Ezequiel Mosquera participou este venres no acto de presentación do evento como principal organizador da proba, e comparou o percorrido "cunha pequena etapa raíña dunha Vuelta" polos quilómetros e o desnivel acumulado, ademais de sinalar a idoneidade dos Ancares para o ciclismo que busca "boa montaña, boas estradas e pouco tráfico".
Pola súa banda, o deputado Efrén Castro referiuse ao evento como "unha aposta da área de Deportes por consolidar nos Ancares unha proba que aproveite as grandes posibilidades que ofrece a comarca para o ciclismo".
O formulario de inscrición está dispoñible na web oficial do evento. O prazo está aberto ata a semana anterior á súa celebración.