Despois do éxito da iniciativa que o ano pasado puxeron en marcha El Progreso e FutbolinLugo, a segunda edición da guía do fútbol provincial porase á venda o vindeiro sábado, día 21 de setembro. Fútbol en Lugo regresa aos quioscos cunha exhaustiva análise dos equipos que compiten nas categorías autonómicas, desde a Preferente, ata a Terceira, ademais dos conxuntos que compiten nas distintas ligas femininas.
A boa saúde que ten o fútbol provincial quedará reflectida nas páxinas desta guía, que incluirá un análise de todos os equipos e unha ficha persoal de todos os xogadores e xogadoras dos conxuntos da provincia.
Son seis os equipos que estes anos representan ao fútbol lucense na Autonómica Preferente: Viveiro, Ribadeo, Foz, Sarriana, Lemos e Residencia. O ascenso que lograron os dous últimos a pasada campaña é o obxectivo que buscan os conxuntos que competirán na Primeira Autonómica, unha categoría tremendamente competitiva que ano a ano deixa partidos plenos de loita e emoción grazas ao premio que esconde.
A provincia énchese de fútbol cada fin de semana grazas á Segunda e Terceira Autonómica, que por suposto tamén terán cabida en guíaa Fútbol en Lugo. Son eses equipos, os máis modestos, o que demostran que se pode xogar por amor ao deporte. A cita xa está marcada. Será o vindeiro sábado, día 21 de setembro, cando os afeccionados ao fútbol poderán facerse cunha publicación imprescindible. Por só 1,5 euros, todo o fútbol ao alcance de todos.
