A súa timidez nas respostas contrasta co seu potencial nos cuadriláteros. Tranquila fóra deles, é un bulebule cando se enfunda as luvas. É Carla López, que aos seus 14 anos converteuse na primeira muller lucense en conseguir unha medalla de ouro nunha disciplina puxilística. O ano pasado quedou ás portas, pero en 2020, e por circunstancias obrigadas pola pandemia, a liga Galega infantil finalizou de xeito anticipado a tempada e entregou á lucense a honra que se gañou nas tres probas disputadas ata ese momento.
O seu idilio co boxeo empezou hai tres anos. Con 11, e logo de probar varios deportes que non lle encheron, Carla López decidiu apuntarse ao Boxing Club Cidade de Lugo para, segundo explica, "probar novos deportes". Deixar a ximnasia rítmica polo boxeo pode ser un contraste forte, pero a lucense tívoo claro. "Probei o boxeo e gustoume, é un deporte que che serve para a vida, para defenderte e no que traballas moito os brazos e as pernas. É moi completo", di.
Para a actual campioa da liga Galega infantil -e medalla de bronce no campionato de España- todo empezou no primeiro torneo de boxeo ao que acudiu, hai xa tres anos. O seu adestrador, José Luís Álvarez Jr., recorda con nitidez aquela primeira experiencia que cambiou a vida de Carla para sempre.
"Fomos a Palmeira, en Ribeira, e non levou ningunha medalla. Era moi pequeniña e desde entón púxose as pilas e gañou medallas en todas as competicións que participou. Faime graza, porque nunca vin a alguén tan motivado", conta o seu adestrador.
Ás portas en 2019: de participar en todas as probas do anterior campionato, sería campioa
Unha motivación que serve de exemplo para as moitas nenas que nos últimos anos seguiron os pasos de Carla e apuntáronse ás clases de boxeo que imparte o citado clube no Palomar. "Temos moitísimas. Hai que ter en conta que en Galicia había 60 licenzas fai 20 anos e agora hai máis de 3.000", explica Álvarez.
O seguinte paso de Carla López é probar no boxeo escolar, unha disciplina que permite o contacto -ata agora competiu en Sombra, Corda, Saco e Manoplas, disciplinas para boxeadores menores de 14 anos- que, entre outras regras, obriga aos púxiles usar só un 50% da súa forza. "Probei en adestramentos contra mozas doutros ximnasios e gústame moito".
Un novo horizonte para unha campioa cuxa traxectoria é o mellor espello para todas aquelas nenas que, como ela, penétranse nun deporte como o boxeo.
