Moctar El Hacen, o futbolista decisivo para o Lugo

O triunfo do Club Deportivo Lugo ante o Atlético Pulpileño (1-2) na primeira rolda da Copa do Rei deixou varias conclusións positivas para os branquivermellos, e entre elas destaca a recuperada capacidade goleadora dun mediocentro, El Hacen, que cos seus goles e determinación contribuíu de xeito fundamental á permanencia ligueira do equipo a pasada tempada.

A súa chegada a Lugo estivo rodeada de dúbidas, primeiro por ser un xogador semidescoñecido para o gran público e, segundo, porque apenas contaba no Real Valladolid Promesas, con Rubén Baraja de adestrador, onde xogou 31 partidos en dous anos. A súa fichaxe reforzou un centro do campo lastrado polas lesións e a súa aterraxe no clube non puido ter un mellor balance: cinco goles (13 puntos) desde a xornada número 28 ata a 41, é dicir, no tramo máis determinante da tempada.

E é que o pasado outono para o Lugo, o de 2019, foi o máis duro deportivamente falando dos últimos anos. O equipo de Eloy Jiménez terminou ese ano cunha eliminación de Copa e un empate en Málaga que provocou, entre outras cousas, a destitución do adestrador, a chegada de Curro Torres e as fichaxes de Jaime Seoane, Kravets, Lass Bangoura e o mauritano do gol, Moctar El Hacen.

Se o paso de Lass deixou máis dubidas que certezas, o de Kravets supuxo un alivio para a afección lucense e o de Jaime Seoane fortaleceu un centro do campo con moitas dúbidas no primeiro tramo do curso, a vinda de El Hacen provocou que o seu nome estivese na fala da xente desde os seus primeiros partidos. Cun físico impoñente, gran capacidade táctica e posicional e unha fame de gol que se puxo de manifesto nos seus primeiros partidos, o mauritano deixou unha pegada indeleble no clube polo seu sacrificio, compromiso e inspiración goleadora.

A relación converteuse en idilio cando El Hacen transformou en Tenerife o gol da vitoria que deixaba practicamente sentenciada a salvación a falta dunha xornada para o final. O flechazo creceu máis se cabe unha semana despois coas bágoas de alegría do mediocentro tras confirmar a permanencia ante o Mirandés, logo de varias xornadas vivindo no arame.

Contra o Pulpileño -do mesmo xeito que contra o Fuenlabrada, Oviedo, Rácing, Alcorcón e Tenerife a tempada pasada- o mauritano exhibiu a súa pegada e determinación para clasificar ao Lugo para a seguinte rolda dunha competición, a Copa, que historicamente se lle deu mal ao equipo lucense.

Co mauritano en liza, quen sabe se este ano o conto copeiro ten outro final.