O ruxido dos motores non tronará nas estradas da Pontenova. O cheiro a gasolina queimada polos coches non encherá o aire desta localidade da Mariña este ano. A crise sanitaria do Covid-19 levou por diante a novena edición dunha das grandes citas do verán automobilístico galego: a Subida A Pontenova. A organización desta competición decidiu suspender a edición deste ano deste evento incluído no Campionato Galego de Montaña.
"Ante a crise sanitaria vivida nos últimos meses en todo o mundo, vémonos na obriga, moito ao noso pesar, de suspender a celebración da Novena Subida A Pontenova este ano 2020", rezaba o comunicado da Escuadra A Pontenova, organizadora desta proba do calendario da Federación Galega de Automobilismo e que se tería que celebrar o 4 e 5 de xullo.
Os motivos para tomar a decisión son o sanitario por ser de difícil garantía o levar a cabo "as medidas de seguridade e distanciamento social nunha proba deste tipo".
A organización considera que un posible rebrote do Covid-19 nas datas previstas para a celebración da proba podería "afectar á celebración da proba en vindeiros anos" polo "esforzo do persoal e o custo económico de organizar este tipo de proba".
"Economicamente sería inviable sacar a proba adiante xa que establecementos colaboradores e patrocinadores despois de atravesar un momento difícil non están no momento de poder colaborar coa proba. Así mesmo, aproveitamos para dicir publicamente que renunciamos neste ano a tódalas axudas públicas recibidas por parte do Concello da Pontenova, Deputación de Lugo e Xunta de Galicia".
Esta suspensión da Subida A Pontenova súmase a outras que afectaron o calendario da Federación Galega de Automobilismo, que apenas conta con eventos nos próximos meses de verán nos seus distintos campionatos autonómicos.
