O Fluvial de Lugo márchase de Viveiro coa tranquilidade de seguir como líder na clasificación xeral logo de conseguir o seu terceiro triunfo consecutivo na quinta proba da Liga Provincial de Lugo. Daniel Rodríguez Estévez e Nora María Rey Rodríguez foron os vencedores na disciplina sénior. A proba este ano bateu a marca de participación nunha competición desta Liga ao sumar 367 remeiros.
Deste xeito, o Fluvial liderou a táboa de clubs con 4.376 puntos, seguido polo Cidade de Lugo, con 3.066, e o Viveiro Urban Hotel, con 1.137. Completaron a clasificación o Kayak Foz, o Altruán de Ribadeo e o San Ciprián.
Na categoría masculina sénior k-1, de 5.000 metros, Daniel Rodríguez Estévez (Cidade de Lugo) foi o vencedor, cunha marca de 15 minutos, 57 segundos e 21 centésimas. A prata foi para Manuel Carreja Martínez (Viveiro Urban Hotel), que terminou en 16.19 minutos, e o bronce para Javier Illanes Rodríguez (Viveiro Urban Hotel), cun tempo de 16.21 minutos.
Pola súa banda, na disciplina feminina sénior, Nora María Rey Rodríguez (Fluvial) subiuse todo o máis alto do podio ao completar os 5.000 metros do percorrido en 19 minutos, 42 segundos e 70 centésimas. Tras ela terminaron Sabela Castro Martínez (Cidade de Lugo), cun tempo de 19.47 minutos, e Lucía Hernández Vellisca (Fluvial), que parou o cronómetro en 19.51.
En veterano k-1, Fiz Fernández (Cidade de Lugo) foi o primeiro ao terminar en 16.39 minutos. Francisco Vázquez (Fluvial) foi segundo con 16.51 e Marcos Illanes (Viveiro Urban Hotel) terminou como terceiro no caixón con 16.59 minutos. Na disciplina feminina, María Ángeles del Riego (Cidade de Lugo) colgouse o ouro ao parar o crono en 22.28 minutos, mentres que Patricia Jubón (Cidade de Lugo), con 23.32, e Aída Jover (Fluvial), con 24.49 minutos, terminaron tras ela.
Raúl Simón Maleno (Fluvial) foi o vencedor en sénior c-1, mentres que Manuel Pociña (Fluvial) terminou como primeiro en veterano c-1.
Nas demais categorías, os gañadores foron: en cadete k-1, Adrián Neira (Fluvial) e Enma Devesa (Cidade de Lugo); en cadete c-1, Javier Moscoso (Fluvial); en xuvenil k-1, Jorge Crespo (Fluvial) e Alicia López (Cidade de Lugo); en xuvenil c-1, Jose Núñez (Fluvial); en infantil A k-1, Iago García (Kayak Foz) e Nerea Debesa Calvo (Kayak Foz); en infantil A c-1, Pablo Fernández (Cidade de Lugo) e Antía Rodríguez (Fluvial); en infantil B k-1, Juan Devesa (Fluvial) e Andrea Rodríguez (Altruán de Viveiro); e, finalmente, Teo Llamazares (Cidade de Lugo) en infantil A c-1.
Ademais, David Alonso (Kayak Foz) e Aída Fonseca (Fluvial) gañaron en alevín A k-1; Anxo Fara (Viveiro Urban Hotel) e Aitana Parga (Fluvial) en alevín B k-1; Manuel Martínez (Fluvial) e Elena González (Altruán de Ribadeo) en benxamín k-1; e, por último, Manuel Lombao (Fluvial) e Ángela Abel (Cidade de Lugo) terminaron como primeiros na disciplina prebenxamín k-1.
