O equipo de orientación en bicicleta de montaña do Club Fluvial de Lugo fíxose co título de campión da liga Española por terceiro ano consecutivo. A pasada fin de semana, o equipo do Fluvial trasladouse a Aznalcazar, en Sevilla, co obxectivo de defender o primeiro posto na clasificación e así proclamarse campión de novo.
Alí disputouse non só a última carreira de Liga Nacional desta especialidade, senón que tamén estaban en xogo a liga Española de clubs.
Coa súa magnífica actuación, os integrantes do equipo lucense lograron situarse por diante do equipo Gallaecia Raid, que tamén se xogaba estar no alto do podio.
Na clasificación final, o Fluvial acabou con 4.753,55 puntos, seguido do Gallaecia Raid (4.464,00), do SRK (3.751,62); do Lorca-o (3.335,96) e do Altair (3.113,65).
Os resultados conseguidos durante a proba, foron: Sonia Gómez Naya acabou primeira en F-40, Francisco Varela Lorenzo foi segundo en M50; Pablo Fernández Sánchez, segundo en M-17, José Manuel Fernández Souto, quinto en M-40; Carlos Fernández Martínez, sétimo en M-21, e José Manuel Nogueras Marentes, decimoterceiro en M-40.
