O segundo adestrador do Durán Maquinaria Ensino, Fernán Varela, asegurou este mércores na rolda de prensa previa ao partido deste xoves ante o Kangoeroes belga, correspondente á segunda xornada da Eurocup, que a formulación do partido, debido ás seis baixas confirmadas, será "diferente, tal e como se viu no último encontro de liga ante a Gran Canaria".
Varela compareceu en rolda de prensa para analizar o duelo europeo e demostrar confianza nas cinco xogadoras dispoñibles, ademais das tres júniors que completan a convocatoria. "Marina Lizarazu, Laura Aliaga, Georgina Bahí, Sofía da Silva e Chatrice White teñen capacidad, nivel e implicación para tratar de gañar. Temos a virtude dun persoal versátil, e agora hai que aproveitarse diso para montar unha estrutura que compita este xoves", explicou.
O grave problema de lesións que arrastra o club lucense obriga á directiva a intentar aprazar o encontro deste domingo ante o Tenerife, que como recoñeceu Varela, demostrou "boa predisposición nas conversas, pero o problema é atopar unha data factible".
Sobre o seu rival deste xoves, o Kangoeroes Basket de Mechelen (20.15 horas no Pazo), Varela recordou que demostrou un "alto nivel" na primeira xornada ante a Valencia. "É un equipo con boa capacidade física, con talento e tecnicamente capaz de moitas cousas. Esperamos un partido bonito e gustaríanos que o ambiente recordase ao da previa da Eurocup. Sería unha marabilla ter o apoio da xente", finalizou.
