A FEB bota o peche á tempada do Ensino

O Durán Maquinaria Ensino xa non competirá máis esta tempada, a falta de que a Federación Española de Baloncesto faga oficial que descarta que se xogue o play off polo título e despois de que decidise este luns dar carpetazo á tempada regular nas dúas principais categorías do baloncesto feminino. Nunha reunión telemática, os clubs aceptaron acabar sen descensos e con dous ascensos.

Esta decisión de ampliar a 16 equipos a Liga Feminina Endesa para o próximo ano foi o único punto discordante, xa que había varios clubs en contra.

“Estabamos a favor de que se terminase a liga e que non houbese descensos. No tema dos ascensos era un pouco máis complicado. Se cadra, se fosen clubs galegos, non era problema, pero que sexan de fóra fai que sexan dúas viaxes máis, catro partidos máis... son máis gastos e preferiamos que non houbese (ascensos). Pero tamén entendemos a posición dos clubs que investiron diñeiro este ano e queren ascender. Houbo unanimidade practicamente en todas as cuestións, salvo algún equipo que non quería que houbese ascensos”, declarou o presidente do Ensino, Manuel Durán.

A conclusión da liga é positiva para o club lucense, xa que lle suporá “un lixeiro aforro económico”. O aspecto negativo será a imposibilidade de acabar quinto. “No tema deportivo tiñamos a espiña de poder xogar o play off e, sobre todo, por ser ambiciosos e tratar de chegar ao quinto posto. As xogadoras querían ser quintas. Tal e como tiñamos o calendario podiámolo conseguir”, valorou Durán, quen asegurou que “o sétimo posto en Liga 1 tampouco está nada mal”.

“Falouse na reunión que non tiña razón de ser xogar unha Liga sen público”

A pesar de non ser oficial, Durán dá por feito que non haberá play offâ?? e que a tempada quedará anulada. “Tecnicamente é imposible que se poida xogar o play off. Ninguén ten as xogadoras aquí. Non se pode chamar ás xogadoras, que levan un mes metidas en casa, para que vingan a adestrar. Iso é inviable. Iso está resolto e non haberá campión de Liga, quedará deserto, e as prazas quedarán como están na actualidade”.

Ademais, indicou que espera que a próxima campaña xóguese con público. “Falouse na reunión que non tiña razón de ser xogar unha Liga sen público”. “Se ninguén vai gozar disto non ten sentido este esforzo. Pode ser un mazazo que non haxa público”, dixo.