O Tenerife informou este luns que o adestrador arousán Luis César Sampedro será o técnico do conxunto branquiazul ata o final desta tempada, despois da destitución de José Luis Oltra.
O novo inquilino do banco branquiazul terá como axudante a Cristo Marrero, capitán do último ascenso a Primeira División e, ata a data, adestrador do xuvenil.
A partir das 18 horas Luis César Sampedro completará o seu primeiro adestramento como tinerfeñista.
Luis César Sampedro, tras finalizar a súa carreira en activo como porteiro, entre outros equipos, do Tótem, Faxilde, Arousa, Lalín e Racing Club de Ferrol, iniciou a súa andaina como técnico, na que atesoura tres ascensos de categoría: Club Gimnàstic de Tarragona (Primeira División), Albacete Balompé (Segunda División) e Racing Club de Ferrol (Segunda División).
Tamén estivo á fronte do Club Polideportivo Exido, Alcoyano, Albacete Balompé e Lugo. A súa última experiencia na categoría de prata foi na tempada 17/18, con 38 partidos (16 triunfos, nove empates e 13 tropezos) no Real Valladolid.
Na actualidade, e dentro de LaLiga 1/2/3, é o segundo adestrador en activo con máis partidos dirixidos (421), unicamente superado por Enrique Martín Monreal.
