Un dobre éxito que sabe mellor por todo o esforzo investido niso. O presidente do Club Deportivo Lugo, Tino Saqués, mostrou a súa satisfacción polo ascenso do Polvorín a Terceira División, categoría que axudará aos branquivermellos "a medrar como clube", e pola capacidade que mostrou a filial para preparar aos futbolistas de face ao equipo de Segunda División.
"Foi todo un éxito. O ascenso vainos axudar a medrar como clube, a que os rapaces que vaian saíndo da División de Honra Xuvenil teñan un equipo onde poder seguir medrando e apuntar cara o primeiro equipo. Este, sen dúbida, foi un éxito sen precedentes", comentou o mandatario.
"Son categorías nas que non é nada doado competir. O ano pasado estivemos a piques, pero non puido ser. Este ano demostrados ao longo de toda a tempada que podiamos estar aí. Que podiamos ascender. E, ao final, conseguímolo. É unha maneira de asentarse, facer unha boa cimentación e seguir medrando", engadiu Saqués.
O presidente do equipo lucense destacou a dificultade de chegar a unha categoría como a Terceira División. "Volver a vista atrás, hai doce anos o Lugo estaba en Terceira e agora imos ter ao filial nesa categoría. A idea é facer un proxecto para continuar na categoría e que os rapaces collan experiencia", afirmou.
Saqués recordou que a formación de xogadores para xogar no primeiro equipo, como ocorreu este ano con Dani Escriche, Pedro López ou Luis Díaz, é unha das funcións indispensables dunha filial, e que se levou a cabo á perfección no Polvorín. "Sempre que poidamos contar con rapaces que poidamos subir ao primeiro equipo axúdanos a ter un colchón cando hai baixas ou se producen incidencias no día a día da tempada. É moi positivo poder ter unha filial que che axuda a loitar no primeiro equipo", indicou.
"Eu penso que ascender amosa que se fixo un bo traballo. É unha proba de que se están facendo ben as cousas. Pero tamén entendo que os que teñen que dicir iso e quenes realmente poden valorar os pasos que se están dando son os que están fóra do clube", valorou.
