Epifanio: "Os xogadores foron conscientes do obxectivo"

O adestrador do Río Breogán, Diego Epifanio, celebrou este sábado a vitoria do seu equipo ante o Palma que lle permite acceder á seguinte eliminatoria de play off e asegurou que os seus xogadores, sobre todo tras o descanso, "estiveron moito máis serenos e xogaron sendo moi conscientes do obxectivo". "A presión sempre existe, hai que convivir con ela", asegurou na rolda de prensa posterior ao encontro. 

O adestrador do Breogán explicou que o seu equipo "cometeu moitos máis erros dos que queriamos na primeira parte" e engadiu que "non falo de esforzo, porque sempre é insuperable, pero si de erros que non buscabamos". "Eles xogan, claro, pero creo que estivemos peor na primeira parte que na segunda. Custounos un pouco entrar ao partido", recordou. 

Logo dun primeiro triunfo e unha derrota no segundo partido, Epifanio recoñeceu que coñecían á perfección os focos de anotación do equipo rival. "Tiñámolo moi claro e nese sentido o esforzo defensivo foi moi bo. É para estar orgulloso de todos os xogadores", dixo. 

O técnico defendeu o rendemento do seu equipo ao longo da tempada. "Están a facer un grandísimo ano e, sobre todo, saben da importancia que cada un ten no equipo. É certo que en partidos así hai máis nervios, pero vinos moi tranquilos, en ningún momento transmitiron ansiedade. Tras o descanso xogamos ao que queriamos e movemos moito mellor o balón". 

Neste sentido, recoñeceu que tras o "susto gordo" que sufriu Kevin Larsen no primeiro partido, tomaron a decisión de dosificar os seus minutos no segundo encontro e na cita deste sábado. "Pola mañá a súa dor era case inexistente, e o seu desexo de xogar, altísimo. No último cuarto achegóuseme varias veces para entrar en pista e díxenlle que non, que garde a súa enerxía para a seguinte batalla", explicou. 

Para rematar, Epifanio agradeceu o apoio dos 1.600 afeccionados que se deron cita no Pazo. "Estiveron magníficos. O efecto Pazo foi de grande axuda".

"A arbitraxe non foi equitativa", asegura o adestrador da Palma

PAU TOMÁS. O adestrador da Palma, Pau Tomás, felicitou ao Breogán pola súa vitoria e a clasificación e desexou o seu ascenso á máxima categoría, pero recordou "en quente", que "a arbitraxe en ningún momento foi equitativa, porque non pode ser que o noso mellor xogador acabe eliminado por cinco persoais, tres delas en ataque. Sufrimos agarróns, arañazos... somos un equipo novo que caeu nesas situacións". 

Con todo, Tomás celebrou o feito de estar "no partido a falta de cinco minutos, porque o meu equipo non baixou os brazos en ningún momento". Neste sentido, apuntou que "exteriorizaron impotencia por todo o que tiveron que sufrir, pero voume moi orgulloso deles. Viñamos gañar, somos ambiciosos, e forzamos o terceiro partido a todo un Breogán diante de 1.600 afeccionados que non pararon de animar".