Epifanio: "Soubemos competir ante un rival moi loitador"

Diego Epifanio, adestrador do Leite Río Breogán, quixo ante todo "felicitar" aos seus xogadores polo esforzo. "Creo que fixeron un gran partido, a pesar de que as nosas porcentaxes, tanto de triplos como de tiros libres non foron bos", dixo o técnico.

Destacou Epifanio, iso si, que o Breogán soubo "competir cun equipo que loita ata o final, que che pon as cousas moi difíciles, que xogan a moi bo ritmo e que te incomoda durante moitas fases do partido".

Analizando o encontro, o preparador de Breogán comentaba: "Empezamos moi ben o primeiro cuarto, compartindo o balón. Kevin (Larsen) fixo moi bo traballo, non só de anotación senón de xerar para os demais compañeiros, e deixamos nun marcador bastante baixo ao Palencia na súa casa na primeira parte. Logo, na segunda parte, eles subiron o nivel. Ademais, nós, nas tres primeiras accións, fallamos un triplo estando sos, unha bandexa e unha canastra baixo o aro e iso creo que tamén nos condicionou un pouco".

Insistía Epifanio na boa actitude do seu equipo e destacaba que "o esforzo dos mozos foi moi bo e durante gran parte do partido fixemos o que queriamos facer. O rato que xogamos sen acerto seguimos traballando".