Epifanio: "O efecto Pazo foi brutal outra vez; de chapeau"

O adestrador do Río Breogán, Diego Epifanio, celebrou o triunfo ante o HLA Alicante agradecendo o "efecto Pazo", que cualificou de brutal, "outra vez. Chapeau por eles, porque cando o teu equipo gaña de 18 puntos é moi fácil animar e sentirse orgulloso, pero cando vas doce abaixo é cando se ve de verdade á afección. O Pazo demostrou que é unha pena que a pandemia non deixe entrar máis xente, porque, cheo ata a bandeira, sería espectacular". 

O adestrador do Breogán felicitou os seus xogadores polo que, considerou, "un auténtico partidazo de play off". Segundo o técnico local, "foi un partido moi vibrante, no que empezamos moi ben pero no que o Alacante se mete grazas ao seu acerto. Primeiro metemos 30, logo eles meten 28 no segundo e terceiro cuarto, e acabamos metendo 28 no último cuarto. Foi un partido no que os dous adestradores tivemos que corrixir moitas cousas", indicou. 

Epifanio quixo destacar o "esforzo" de Mo Soluade, que se retirou con molestias no segundo cuarto "e sabía que faría todo o posible para volver. Hai que agradecer a Pablo, Luis e Rubén —equipo médico do Breogán—, porque desde que Soluade saíu do campo, fixeron todo para que volvese". 

Sobre o Alicante, o técnico lucense asegurou que é un "equipazo que ten as cousas moi claras" e que calquera afeccionado, sexa do equipo que sexa, "goza véndoos xogar". Neste sentido, destacou o seu acerto exterior, explicando que nos pesou moito que metesen por fóra, e é verdade que eles, sen coller moitos rebotes ofensivos, castigáronnos demasiado nese aspecto". 

Para rematar, Epifanio congratulouse do baixo número de balóns perdidos (só catro). "Isto é algo moi bo para a confianza dos xogadores. Significa que compartimos ben o balón e que xeramos boas accións de canastra. Iso si, non recordo un partido con tanto acerto desde a liña de tres. Foi un espectáculo, moi divertido", concluíu. 

PEDRO RIVERO. O técnico alacantino, Pedro Rivero, felicitou ao Breogán polo triunfo e criticou o esforzo defensivo dalgún dos seus xogadores, sobre todo no primeiro cuarto. "Preocúpame o inicio e a pouca dureza dalgúns. Se vés ao primeiro partido dunha semifinal para ascender á ACB e saes así, píntanche a cara. Temos que aprender disto, porque Larsen fíxonos once puntos sen case decatarnos". 

A pesar de todo, Rivero destacou a reacción do seu equipo no segundo e terceiro cuarto. "Puxémonos ao seu nivel e demostramos que podemos competir. Con 17 puntos abaixo hai que facer moitas cousas ben para volver ao partido, e fixémolo". 

Para rematar, Rivero achacou a derrota no último minuto "por algunhas malas decisións nosas, moi mal tomadas, que nos custaron o partido".