Dous burelenses vivirán con especial intensidade o primeiro encontro de rivalidade provincial da historia da LNFS entre o Burela FS e o Azkar Lugo, que se celebrará mañá na cancha dos transportistas, ás nove e cuarto da noite. Iago Míguez e Jandri sairán á cancha con camisetas diferentes, pero cun pasado común, xa que ambos comezaron a súa traxectoria nas categorías inferiores do Burela FS.
Os dous, que ademais son primos irmáns, intentarán contribuír ao triunfo dos seus, pero terán que facelo superando as súas propias emocións e xogando ante o seu pasado. Iago Míguez afronta a súa segunda tempada consecutiva no Burela FS logo de deixar precisamente o Azkar, o equipo ao que chegou como cadete e no que debutou na máxima categoría. Jandri, pola súa banda, defende a camiseta do Azkar por segunda tempada logo de desenvolver toda a súa traxectoria nas categorías inferiores no Burela FS e chegar ao conxunto da capital para militar no Azkar B, na tempada 2009-10.
