O Durán Maquinaria Ensino espertou tarde no seu debú ligueiro e perdeu este sábado por 60 a 68 fronte ao potente Cadí La Seu no Open Day da liga Dia que se celebra en Zaragoza.
O equipo que adestra Juan Nécega, que contou coa sensible baixa da escolta internacional sueca Kalis Loyd, chegou a ir perdendo por 15 puntos de diferenza (28-43) ao principio do terceiro cuarto fronte a un rival que disputará competición europea, tras quedar terceiro a tempada pasada.
Atonye Nyingifa asumiu entón a responsabilidade en ataque e achegou ao Ensino a só un punto do conxunto catalán, 54-55, a falta de seis minutos para o final. Pero o equipo lucense non conseguiu culminar a remontada.
Nyingifa foi a mellor xogadora do partido, con 17 puntos, 14 rebotes e seis asistencias, con 32 puntos de valoración, polo que pode ser a MVP da primeira xornada de liga.
