O parón das seleccións non acougou as augas dentro do Durán Maquinaria Ensino. Se antes dos encontros internacionais, o equipo lucense contaba con algunha xogadora lesionada ou con molestias, o break, lonxe de permitir a recuperación de certos efectivos, engadiu problemas físicos dentro dun persoal que xa perdeu a Marta Tudanca —por falta de minutos— e Alicia Villegas —lesión de longa duración—.
"Chegamos curtos de efectivos ao partido contra o Cadí", confirmou este luns Carlos Cantero, adestrador do Ensino. "Hai xogadoras que chegaron lesionadas dos seus compromisos internacionais e non temos substitución en tema de fichaxes. O que nos queda agora é adestrar o mellor que podamos e sacar o mellor rendemento das que están", explicou o técnico.
Cantero refírese ás molestias de Bea Sánchez, que participou en oun 3x3 coa selección española —acompañada de Vega Gimeno— e que aterrou en Lugo cun dor no xemelgo. "Van den Adel vén contenta porque tivo un bo rendemento no seu partido contra Hungría. Stanacev está animada por formar parte dun equipo potente como é Serbia, aínda que non contou cos minutos que esperabamos. Bea Sánchez e Vega Gimeno participaron no 3x3 con España, pero Bea veu con molestias", confirmou Cantero.
Sobre a súa visita ao Cadí La Seu —o xoves ás 20.00 horas—, o técnico matizou que está "bastantes chanzos por encima do Ensino, tanto a nivel de persoal como a nivel de equipo". Segundo Cantero, o Ensino pon o seu foco neste aspecto e non noutros como "o covid ou o tema de fichaxes", do que o adestrador ensinista si confirmou que están a estudar novas incorporacións, "en plural".
Para rematar, Cantero destacou que o Cadí La Seu está a ser "pouco consistente desde a liña de tres", algo que obrígalles a ir a por o partido pese ao potencial do rival.
