jueves. 23.01.2020 |
El tiempo
jueves. 23.01.2020
El tiempo

Na ACB de pleno dereito

Jesús Lázare e Javier Morandeira, este luns na sede da ACB. EP
Jesús Lázare e Javier Morandeira, este luns na sede da ACB. EP

O Breogán forma parte da máxima categoría do baloncesto español tras ser aceptado este luns por unanimidade. "Agora toca vestir o proxecto, aínda que o club non estivo parado, nin moito menos", asegura Jesús Lázare

O CB Breogán xa é oficialmente membro de pleno dereito da ACB, despois de que os outros dezaseis membros que forman a asociación de clubs, e reunidos este luns en asemblea celebrada en Barcelona, votasen de forma unánime a favor do ingreso da entidade breoganista e do Basket Manresa, campión de Liga e vencedor do play off de LEB Ouro, respectivamente.

Aínda que desde hai algunhas datas -o 15 de xuño o Breogán xa realizara o pago correspondente ao valor de participación e superara a correspondente auditoría- xa se sabía que o ingreso do club lucense estaba practicamente feito, aínda faltaba a ratificación da asemblea para que o Breogán poida ser parte, con voz e voto, nas decisións que a partir de agora se adopten con respecto á máxima competición española de baloncesto.

A ACB fixo pública a admisión do Breogán e Manresa recordando a condición de históricos de ambas as entidades, xa que o lucense é o duodécimo club español con máis encontros na máxima categoría cun total de 760 (156 na que se denominaba Liga Nacional e 604 na ACB). O Manresa é o sexto neste apartado cun total de 1.414 encontros, dos que 1.070 foron disputados na liga ACB, na que ademais se proclamou campión de Liga hai xustamente vinte anos.

Nesta histórica asemblea estiveron a representar ao CB Breogán o presidente da entidade, Jesús Lázare, e o adxunto ao consello de administración Javier Morandeira.

SATISFACCIÓN. Lázare expresou ao termo da reunión a súa satisfacción ao culminar o reto de situar de novo ao Breogán na elite do baloncesto español. "Todo estaba encamiñado desde hai tempo, pero había que completalo co trámite da ratificación da asemblea. Todos os clubs votaron a favor da nosa entrada e desde logo síntome moi feliz como afeccionado e como presidente do Breogán", sinalou.

Á marxe do éxito deportivo, o ascenso breoganista tívose que completar co cumprimento duns esixentes requisitos burocráticos e económicos. "Houbo un par de momentos complicados. Reunir o diñeiro para pagar o valor de participación quizá foi o máis difícil, pero tras a cesión de uso do Pazo por parte da Deputación a situación patrimonial da sociedade é boa. Houbo moito papelorio, pero o traballo das oficinas do club, de todos os empregados, foi estupendo e souberon superar todos os obstáculos", comentou o presidente breoganista.

O Breogán, unha vez admitido, xa participou na asemblea como un máis. "Así é. Aínda que acabamos de chegar xa intervimos nalgunhas cuestións e empezamos a coñecer as reviravoltas dunha organización como esta", dixo o dirixente breoganista.

A partir de agora, o reto é prepararse o mellor posible, económica, social e deportivamente, para afrontar a tempada coas maiores garantías posibles. "Agora toca vestir o proxecto. O club non estivo parado nin moito menos, en breve iremos anunciando renovacións e contratos. Nesta semana creo que haberá noticias das que gustan aos afeccionados", sinalou Lázare.

Da campaña de abonados, o presidente do Breogán encomiou a resposta dos afeccionados. "Estamos moi contentos, xa estamos nos 3.500 abonados e confío en chegar moi pronto ao noso obxectivo de 4.000 abonos", concluíu o máximo mandatario do equipo lucense.

Na ACB de pleno dereito
Comentarios