Eloy Jiménez, adestrador do CD Lugo, mostrouse contento cos movementos do equipo galego no mercado estival, pero tamén recoñeceu que lle faltan cinco ou seis fichaxes máis. "Fáltanos un central, un lateral esquerdo, outro mediocentro, outro dianteiro e un xogador específico de banda esquerda. Quedan entre cinco ou seis xogadores por chegar, pero hai que ter en conta o que o mercado demande e o que o club poida pagar", comentou na súa primeira rolda de prensa da tempada.
O preparador branquivermello asegurou que o Lugo terá "un equipo bastante equilibrado" cando consiga pechar o persoal e deixou claro que "o que se está fichando está a facerse moi ben".
Jiménez analizou as caras novas do persoal e sobre o porteiro Ander Cantero indicou que é "bastante completo" e achegará "competencia" nun posto no que loitará pola titularidade con Alberto Varo, suplente de Juan Carlos Martín a tempada pasada.
No centro do campo, o Lugo fichou a Borja Domínguez e Jaume Grau, "dous mediocentros de moitísima calidade pero que á vez teñen capacidade de traballo". E para a punta chegou Carlos Castro, do que destacou que "é listo, móvese ben entre liñas, é rápido e ten gol".
O preparador do Lugo desexou "facer unha familia" no vestiario e, no campo, "un equipo que curre e sexa complicado". Tamén fixo fincapé na "impresionante actitude" dos futbolistas, que chegaron "con moita ilusión e fame", algo que o está "sorprendendo para ben".
Jiménez explicou que na pretempada "intentará facer grupo" e para iso concentrará ao equipo na localidade lucense de Vilalba. O camiño cara á estrea na LaLiga 1/2/3 comezarao ante un rival de Primeira División, o Celta de Vigo. "Non é o máis adecuado para empezar, pero imos competilo, traballalo, facer un partido serio e pór en apertos ao Celta. É un partido de pretempada sen máis", sostivo.
