Eloy Jiménez: "Esta semana concretarase o meu futuro"

O adestrador do Lugo, Eloy Jiménez, referiuse ao seu futuro e admitiu que "esta semana" falará co club e "concretarase" a súa continuidade, que parece cousa feita a tenor do interese das dúas partes porque o técnico de Hellín continúe.

"Creo que esta semana falaremos e concretarase. Eu estou moi contento aquí, é un club familiar e pódense facer as cousas ben. Agora mesmo, a ver se chega todo a bo porto", declarou Jiménez.

Sobre o partido deste domingo ante o Nástic, o manchego asegurou: "Dixen durante a semana que quería que saísemos moi intensos e fixéramos un bo partido, pero sobre todo polos compañeiros que tiveron poucos minutos. Tiñamos que dar un plus por eles porque eles ían saír ao máximo".

Jiménez referiuse á marca de minutos sen encaixar un gol e cualificouno de "bonito", aínda que indicou que "o importante é que o equipo seguise sendo sólido, aínda que no primeiro tempo hoxe (por este domingo) non estivemos como eu quería".

O adestrador branquivermello xustificou os cambios no once titular. "Teño coñecemento dos xogadores porque os vexo competir cada día nos adestramentos, pero quería probar á xente que tivo menos minutos e que mereceron xogar máis. Por iso era normal que faltase ritmo".

"Vin ben a Orest (Lebedenko), que debutou e fixo un gran partido e deixou unha referencia de que pode competir ben", engadiu.

"Estou moi contento cos meus xogadores, porque desde o primeiro momento o seu comportamento foi exemplar para conseguir a permanencia".

Sobre o futuro do club, Jiménez valorou que "terase que falar no club e débese ter máis tranquilidade. A nivel xeral foi un ano difícil".