O Ribadeo deixou escapar unha boa oportunidade de coller unha boa renda sobre un rival directo, o Galicia Mugardos, ao empatar a un en casa. Os mariñáns polo menos puideron salvar un punto no tramo final, xa que o partido púxose costa arriba á media hora da primeira metade e parecía que os tres puntos voaban xa do Pepe Barreira.
O cambio de Vilachá ao introducir no terreo de xogo a Elías resultou providencial, xa que a media punta apareceu para culminar unha boa xogada colectiva a falta de tres minutos para o final.
O Ribadeo foi de menos a máis no partido. Os celestes comezaron titubeantes ante un Mugardos ben plantado. Ao equipo de Vilachá custoulle combinar e chegar con claridade á área contraria, aínda que houbo algún achegamento perigoso, como o de Chinco, no minuto 17, ou outra chegada de Rafa Casanova, ao fío do minuto 25.
As dúas ocasións perdoadas polo Ribadeo tiveron unha inmediata resposta por parte do Mugardos. O conxunto coruñés aproveitou a súa primeira acción de perigo para porse por diante no marcador, tras unha indecisión defensiva que castigou a punta visitante Pitu.
O Mugardos incluso puido chegar con maior vantaxe ao descanso, pero o colexiado anuloulle un gol a Canosa.
A segunda metade foi totalmente diferente. O Ribadeo apostou por un sistema máis ofensivo en busca da igualada e puxo cerco á portería de Javi. Os mariñáns pediron un penalti por mans no minuto 70 e Rafa Casanova e Juan Pablo tiveron dúas claras ocasións antes do gol de Elías. O 1-1 foi un premio merecido para o bo traballo local no segundo tempo, aínda que soubo a pouco para os méritos contraídos.
O empate na casa rompe unha serie de dous triunfos consecutivos no Pepe Barreira e o golaverage co Mugardos queda empatado tras o 1-1 da primeira volta.
