O Spórting Pontenova afronta a súa segunda tempada consecutiva en Segunda Autonómica coa mesma meta da pasada campaña, a permanencia. O conxunto da Mina aposta pola continuidade do adestrador, Dani Moirón, e do bloque da pasada tempada para consolidarse e seguir crecendo. Moirón compaxinará o seu cargo de técnico do primeiro equipo co de xuvenís.
O preparador do cadro pontenovés deixou pronto a súa etapa como xogador, que incluíu ao Cárnicos Río, Meira, Comercial e Pontenova, para dedicarse a adestrar. Como técnico leva unha exitosa traxectoria no cadro xuvenil da Mina e a pasada tempada decidiu tamén aceptar a oferta para dirixir ao primeiro equipo. Nos cinco anos que leva á fronte do cadro xuvenil, Moirón conseguiu meter ao equipo en dúas fases de ascenso á liga galega e incluso acariñou o soño de alcanzar a categoría autonómica na tempada 2009-10. Na súa única campaña como preparador do primeiro equipo, Moirón conseguiu a permanencia, grazas a unha excelente traxectoria como visitante e a unha gran segunda volta.
Moirón contará para a súa segunda tempada co mesmo bloque da pasada, con só tres ausencias. A lista de baixas inclúe a Gene, por motivos laborais, Hugo Leivas, que fichou polo Meira, e Miguel Camiño, que se marcha ao Pol. Para suplir estas baixas, no club da Mina asinan a Luismi Rivas, Sergio Arango e Bruno Bouza. O primeiro é un xogador que xa estivo en anteriores etapas no equipo e tivo que parar por motivos laborais, mentres que o segundo sobe desde o equipo xuvenil. Bouza, tamén con pasado na entidade, é un central que procede do Tapia. «Luismi é un central ou medio centro que nos achegará experiencia, e Sergio é un medio centro que pode achegar cousas moi interesantes ó equipo. Bruno destaca polo seu poderío no xogo aéreo e coa súa alta damos por pechado o cadro de persoal, cun total de 21 futbolistas», explica Moirón.
TRIANGULAR
- Os xuvenís do Depor e do Lugo mídense hoxe co conxunto local. O campo da Mina acolle hoxe un espectáculo futbolístico de primeiro nivel autonómico de face ao futuro, xa que se darán cita algunhas das promesas galegas máis importantes. Os xuvenís do Deportivo e do Lugo, ambos os pertencentes á División de Honra da categoría, mediranse hoxe nun torneo triangular ao conxunto local. A hora de comezo do torneo será as cinco da tarde.
