As Escolas de Fútbol do Polvorín sairán a competir esta fin de semana. O club lucense regularizou a súa situación coa Federación Galega de Fútbol (FGF) despois de saldar a débeda que arrastraba da campaña pasada mediante o pago da mesma. A Federación recibiu na mañá deste martes a confirmación do pago e os equipos do conxunto de Lugo xogarán con normalidade.
Desde a FGF e desde o propio Polvorín confirmouse que o club está á corrente das súas obrigacións e que a débeda de 1.108 euros que o equipo lucense tiña desde novembro de 2017 estaba totalmente saldada.
Tampouco haberá ningún problema cos pagos á mutualidade, xa que, no caso dos equipos infantil e cadete —que non puideron competir a pasada fin de semana—, é a Xunta de Galicia a que, a través do programa Xogade, sufraga o custo da mutua aos equipos galegos nesas categorías. O Polvorín, deste modo, xa conta con todas as licenzas en regra e as fichas no seu poder.
Tan só quedaría que o club regularice ao seu equipo na categoría xuvenil, xunto aos seus adestradores e delegados, xa que en ningún deses casos entran no Xogade e, polo tanto, a mutualidade depende dos clubs.
Desde o Polvorín asegúrase que se atopa en trámites de poder regularizar tamén aos seus xuvenís, pero que primeiro debe ter as licenzas no seu poder —algo que xa ten no caso dos infantís e cadetes— para posteriormente proceder ao pago da mutua, algo que realizarán inmediatamente.
O problema xurdiu a pasada fin de semana cando os equipos infantil e cadete da liga Provincial non puideron disputar os seus partidos ao non ser tramitadas as licenzas debido a que non saldaran a débeda coa FGF correspondente á pasada campaña. Os dous partidos déronselles por perdidos por 3-0 por incomparecencia.
Nese momento xurdiu a preocupación dos pais e xogadores do EF Polvorín, xa que de repetirse a situación esta semana —o que xa non sucederá— e volver figurar como unha segunda incomparecencia na liga, os equipos serían expulsados da competición. Desde o EF Polvorín asegúrase que todo foi un problema de prazos ao pretender fraccionar o pago da débeda e que o tempo se botara encima, aínda que sempre houbo a intención de estar ao corrente de pago.
