O carril dereito do Lugo tivo un dono claro durante as últimas tres tempadas. O paso de diferentes adestradores polo banco do Ángel Carro non freou a progresión de Eduard Campabadal (Tarragona, 26-1-1993), que desde que chegou á cidade amurallada procedente do Mallorca foi indiscutible na posición de lateral dereito.
Co paso dos anos, o catalán fíxose un oco no corazón da afección e foi un alicerce fundamental para o persoal lucense. Esta tempada terminou a súa vinculación co Lugo e a día de hoxe o seu futuro segue no aire, aínda que as súas palabras soan a despedida.
"Este ano acabo contrato. Eu estiven moi a gusto, agora empezarei a falar do futuro. Confío moito no meu representante, fixen ben as cousas pero non se que pasará. Co Lugo falei hai un ano e medio pero non nos decidimos a asinar. Co presidente teño boa relación e dicímonos as cousas á cara pero non hai oferta en firme. No fútbol xa se sabe que todo é posible", indica Campabadal.
"Juanfran é unha gran persoa e un loitador, nótaselle no xeito de comunicar. Tratounos de xeito incrible"
A chegada de Juanfran García supuxo un cambio na dinámica do equipo, sobre todo na parte mental. O lateral só ten boas palabras para o técnico.
"Juanfran merécello todo. A nivel mental fixo que nos sobrepuxésemos a todas as adversidades que tiñamos nese momento. Todos dábannos por mortos e fíxonos ver que tiñamos moita xente detrás, que tiñamos xente que nos animaba, que nos quería e que tiñamos que loitar por iso. Alégrome sobre todo por el, porque é unha gran persoa e porque é un loitador, nótaselle no xeito de comunicar. Tratounos a todos de xeito incrible", explica o xogador do Lugo.
Campabadal recorda con alegría o vídeo que lles enviou Maradona antes do partido ante o Mirandés e recoñece que houbo un momento en que tanto el como o seu compañeiro Varo quedaron asombrados. "Dicíanos (Juanfran) que tiña unha sorpresa incrible. Varo estaba ao meu lado e xusto despois do vídeo de Maradona, vai Juanfran e abre a porta. Eu miro a Varo con cara de asombro e dime: "Espero que non, porque se entra el (Maradona) podémonos morrer", comenta entre risas o xogador.
Maradona pediulles unha camiseta asinada se conseguían a permanencia, aínda que Campabadal recoñece que a que máis ilusión lle fixo asinar é unha con destino a Holanda.
"Teño un amigo que é de Xixón, chámase Diego, e tivo a mala sorte de romper unha vértebra ao tirarse a unha piscina. A súa historia foi toda unha inspiración para min no persoal. Foi capaz de sobreporse a todas as adversidades, é moi boa persoa e agora está a vivir en Holanda. Mandeille a camiseta porque somos amigos e polos ánimos que nos deu. Logo Juanfran, sen eu saber nada, púxome un vídeo del no vestiario. Eu ese día chorei con ese vídeo. Para min é un reflexo, alguén no que fixarse para ver o importante que é seguir e tirar cara adiante, sempre que falo del emociónome", finalizou Campabadal.
"O que me molesta é que se diga que o Lugo non tivo presión, iso é mentira. ¿Se non chega a marcar o Albacete ese penalti, que pasaría? Se se deu ese resultado non habería campañas mediáticas nin pasase absolutamente nada. Non boto a culpa ao Deportivo nin a ninguén, pero é a realidade. Tiñamos que gañar si ou si, por iso moléstame que se diga que tiñamos vantaxe que non xogase o Deportivo. Iso non é verdade. O Lugo tiña moita presión, son moitos partidos, foi unha Liga de 13 meses e queriamos que acabase do mellor xeito", indica o futbolista.
Fran Albert, novo preparador físico. O Lugo anunciou onte a incorporación do alacantino Fran Albert como novo preparador físico do equipo, tras a saída de Kiko Corredoira da entidade. Albert formou parte do Spórting o curso pasado e antes fíxoo no Valladolid e no Celta.
