domingo. 05.04.2020 |
El tiempo
domingo. 05.04.2020
El tiempo

"É un pau moi duro"

Sergi Quintela conduce un ataque do Breogán ante Pluta, do Ourense. VICTORIA RODRÍGUEZ
Sergi Quintela conduce un ataque do Breogán ante Pluta, do Ourense. VICTORIA RODRÍGUEZ
Sergi Quintela di que a baixa de Ahonen foi un revés para o persoal. Engade que a marcha do finlandés chega nun tramo ligueiro que pode ser clave

A semana non está a ser fácil para os xogadores do Leche Río Breogán. Ademais de ter que superar a decepción da derrota sufrida en Oviedo, con todo o que iso representa en canto a obxectivos, tamén teñen que asumir a baixa definitiva dun dos seus membros máis destacados, Roope Ahonen.

"É un pau moi, moi duro. Decatámonos na tarde do martes e non o esperabamos. Vaise non só o mellor tirador do equipo senón de toda a liga. É unha peza clave e que, ademais, estaba (Ahonen) nun bo momento". Son palabras do escolta do conxunto breoganista Sergi Quintela quen ademais engadiu: "Nunca é un bo momento para unha lesión, pero esta chega nun tramo de Liga clave para nós. Febreiro vai ser fundamental para o noso futuro".

O primeiro obstáculo a superar será o do próximo sábado (19.00 horas) no Pazo dos Deportes coa visita do Palencia. Para o xogador lucense tanto el como os seus compañeiros están obrigados "a dar un paso adiante, sobre todo en defensa, para compensar a ausencia de Ahonen. Todos temos que baixar máis o cu e mellorar o noso acerto. Teremos que asumir algo máis de responsabilidade, algúns en defensa e outros en facer algún tiro máis. En definitivo, haberá que facer o que sexa para compensar esa baixa".

Quintela recoñece que a traxectoria do Leche Río Breogán non é a esperada pero que, aínda así, está convencido de que non lles faltará o apoio do público o sábado. "Desde logo, non é a clasificación que esperabamos a estas alturas da liga, pero o público do Breogán sempre estivo connosco e sabe que xuntos imos sacar isto adiante. Todo o mundo sabe que a afección de Lugo é esixente pero tamén que cando ten que estar sempre está e apóianos nos momentos complicados. Non deixaran de estar connosco", dixo.

O do Palencia é un deses partidos que valen dobre porque é un rival directo

O escolta está convencido de que se verá o mellor Breogán en breve, "o noso traballo defensivo debe de ser unha constante e tennos que levar a que o noso ataque sexa máis fiable e vistoso. Ao público gústanlle máis os equipos rápidos, os que xogan en transición e isto chega apertando en defensa porque isto sempre favorece o noso ataque".

Ante o encontro do sábado, Quintela non perde de vista que o Palencia é un rival directo. "É un deses partidos que valen dobre porque é un rival directo. Gañáronnos na súa cancha e, polo tanto, non podemos permitirnos que o fagan tamén aquí. Sería moi importante gañar e deixalos a dúas vitorias de diferenza".

Breogán e Palencia comparten o feito de que ningún dos dous están a responder ás expectativas. "Eles empezaron moi ben e logo desinfláronse e nós tivemos moita irregularidade. Somos dous grandes equipos e isto asegura un gran partido que levará o que teña máis continuidade no seu xogo", comentou Sergi Quintela.

Se facemos o noso xogo, co noso ritmo e limitamos os nosos erros, temos que impoñernos

Ademais, o lucense di do próximo rival que é un aspirante ao ascenso: "Non só polo seu orzamento senón tamén polas fichaxes, polos xogadores que ten no seu persoal. De todos os xeitos, eu estou convencido de que se facemos o noso xogo, co noso ritmo e limitamos os nosos erros, temos que impoñernos".

Do equipo castelán, o breoganista destaca dous aspectos, "teñen un xogo interior potente, onde brilla Larsen e, por outra banda, Dani Rodríguez, un veterano da liga e un mestre do pick and roll".

"É un pau moi duro"
Comentarios