Campións de europa de futbolín. é o título co que se alzaron esta pasada fin de semana en Benidorm Fernando Lamela e Diego Legaspi Gasalla, dous lucenses que se fixeron amigos hai vinte anos xogando e aos que segue unindo esa afección.
Os lucenses impuxéronse nun torneo no que competían duascentas parellas e no que só había outros dous representantes galegos, de Meira, quen tamén levaron algún premio.
O campionato custoulles aos lucenses os seus sacrificios. Para empezar, como se xogaba en futbolines da marca Rem, que son moi raros en Galicia, Fernando e Diego fóronse en varias ocasións a adestrar a Ponferrada, onde ese modelo é máis habitual. Ademais, estiveron adestrando dous días á semana, dúas horas cada vez, para preparar o torneo.
O adestramento non foi moi intenso, con todo, confesaba este luns Fernando, que recoñecía que seguen vivindo das rendas do moito que xogaron na adolescencia. "Antes de ter traballo e de que chegasen os fillos era fácil sacar tempo, pero agora conseguir catro horas para xogar é complicado", dicía.
Ademais, o xogo non é rendible. Gañar o torneo repórtalles mil euros e, a base de gañar clasificatorios, saíulles gratis a inscrición e o hotel. "Este é un hobby non remunerado", din. Así, claro, o prioritario é o traballo. Fernando é perruqueiro e Diego traballa nunha fábrica de madeira.
Fernando Lamela xa se proclamou o pasado verán campión do mundo, naquela ocasión xogando con Víctor Fernández.
