Henk Norel podería debutar co Cafés Candelas Breogán ao renovarse a liga Endesa, interrompida ata o día 2 de marzo pola disputa da Copa do Rei e dos partidos das fiestras Fiba. O xogador, xa coa alta médica, incorporarase paulatinamente ao traballo co equipo. As previsións que manexan os técnicos do Breogán marcan como prematura a posibilidade de convocar o xogador holandés para o partido do día 2 de marzo no Polideportivo Fontes do Sar ante o Obradoiro, polo que o máis probable é que Norel, se non se produce unha recaída na súa lesión, xogue os seus primeiros minutos coa camiseta do Breogán ante o Baskonia, nun partido que se xogará o domingo 10 de marzo ás 17.00 horas no Pazo dos Deportes de Lugo.
Esa data para a súa incorporación parece clave, xa que lle permitiría chegar xa cun bo número de adestramentos e incluso con algúns minutos en cancha ás dúas últimas xornadas do mes de marzo, que poden ser determinantes para as opcións de permanencia do conxunto breoganista. O día 16 visitará ao actual pechacancelas da competición, o Delteco Gipúzkoa, e oito máis tarde recibirá en Lugo a outro rival directo, o Fuenlabrada.
Máis ou menos para esas datas tamén se podería producir o retorno de Tadija Dragicevic que, segundo anunciou na tarde deste martes o Breogán, seguirá no equipo lucense ata final de tempada. O xogador serbio tiña contrato ata o mes de marzo pero a lesión sufrida ante o Manresa o pasado 26 de xaneiro -unha rotura muscular- deixábao na práctica fóra do equipo.
Con todo, e segundo parece a iniciativa propia de Dragicevic , este seguirá ata o final de tempada sen que, polo que parece, esta continuidade repercuta no orzamento do equipo lucense. É dicir, o club non ten que facer un esforzo a maiores e o xogador asegúrase, despois dunha lesión, a posibilidade de volver ás canchas antes de final de tempada, unha circunstancia que pode ser moi importante de cara á súa entrada no mercado para a próxima campaña. Por iso é polo que na nota feita pública polo club lucense se poña de manifesto que foi un acordo "satisfactorio en tódolos termos para ámbalas dúas partes polo que o xogador manterá a súa vinculación ao Breogán ata final de tempada".
Con Norel e Dragicevic, ambos nestes momentos de baixa na ACB, o Breogán chegará a dispor de 14 xogadores polo que, en cada xornada, Natxo Lezkano terá que facer dous descartes.
