As parellas formadas por Martín Sánchez e Pablo Lijó, en categoría masculina, e Ana Alicia Seijas e Andrea Colinas, proclamáronse este domingo campioas galegas de pádel nun torneo que se disputou nas instalacións do Centro Deportivo D10, en Outeiro de Rei.
Martín Sánchez e Pablo Lijó cumpriron co seu papel de favoritos e fixéronse co título, pero non sen sufrir na final que disputaron ante Adrián Blanco e Borja Yribarren. Sánchez e Lijó fixéronse co primeiro set por un claro 6-2, pero os seus rivais reaccionaron no segundo e impuxéronse por 6-1. No terceiro e definitivo Sánchez e Lijó recuperaron o seu mellor nivel e venceron por 6-2.
Antes, na rolda de semifinais, Blanco e Yribarren derrotaran a Daniel Blanco e Pablo Plaza por 6-2 e 6-4. Sánchez e Lijó, pola súa banda, superaran a Borja Castro e David Antolín por 7-6 e 6-4.
Máis clara foi a vitoria na final da categoría feminina de Ana Alicia Seijas e Andrea Colinas, que superaron a Silvia López e Vanesa Alonso por 6-3 e 6-2.
O marcador da final foi o mesmo que logrou a parella ao cabo gañadora na rolda de semifinais, neste caso ante Carmen León
A xornada final reuniu no Centro Deportivo D10 de Outeiro de Rei un gran número de afeccionados, que gozaron da actuación dos mellores xogadores de pádel da comunidade galega.