O partido que xogan o domingo, desde as 12.00 horas, o Girona e o Club Deportivo Lugo ten un dos seus alicientes na portería. Alí vanse a citar o pasado máis recente do conxunto branquivermello cun presente que promete, e moito. Juan Carlos Martín, o que foi gardameta do Lugo durante dúas campañas, defende agora a camiseta dun Girona co que aspira a todo; mentres que no Lugo aparece como sucesor Ander Cantero, que é titular desde o encontro ante o Mirandés e que acumula varias actuacións destacadas no que vai de competición.
Cantero, que se afianzou na portería do Lugo nas últimas semanas logo de iniciar a tempada como suplente de Alberto Varo, recoñeceu este xoves en rolda de prensa a súa satisfacción por como lle vai a tempada. "Estou moi contento porque, cando empezas sen xogar, o que che queda é adestrar día a día coa esperanza de que o adestrador confíe en ti e así foi. As actuacións están a ser boas, pero isto é fútbol e ao final ninguén se acorda do teu anterior partido", comenta.
A meta branquivermello é o que maior porcentaxe de paradas por partido presenta en Segunda División. "Os datos son que nos están chegando moito e é algo no que estamos a traballar e que hai que intentar corrixir porque xogamos contra rivais moi bos e non podes estar a depender tanto das accións do teu porteiro. A liña defensiva cada día atópase mellor e iso é traballo de todos", manifesta.
Juan Carlos desexa "o" mellor ao Lugo, pero recorda que no terreo de xogo "non hai amigos"
Este fin de semana, a meta do Lugo ten un reto complicado por medirse cun dos conxuntos potentes da categoría e que foi, ademais, o que tivo os mellores números no mes de novembro. O gardameta terá que estar pendente, especialmente, de Stuani, "un dos xogadores top da categoría", deses que "sempre motivan a un porteiro". "Pero o Girona non só é Stuani, ten xogadores de segunda liña que chegan ben, futbolistas de banda moi profundos e con bo golpeo e hai que estar o mellor preparados posible", sinala.
Enfronte, Juan Carlos Martín reencontrarase co seu exequipo. O porteiro castelán defendeu a portería branquivermella durante dúas tempadas (2017-19) nas que tivo tempo de facer "moitos bos amigos ao vestiario". "Estiven moi ben e sentinme valorado e respectado. Deséxolles o mellor, pero cando o árbitro pite domingo non haberá amigos", asegura. Juan Carlos Martín destaca tamén que o Lugo está "moi, moi traballado" e que o adestrador, Eloy Jiménez, fai moito énfase na "solidez e contundencia".
De face ao duelo deste domingo, o porteiro do Girona é optimista porque tamén a liña do equipo nas últimas semanas é claramente positiva. "O equipo mellorou nos últimos partidos e fixo un salto competitividade. Esta é a liña a seguir", asegura.
