O CB Breogán ratificou este martes o que adiantou este diario: McCallum non volverá xogar coa camiseta do equipo lucense. Segundo a nota da entidade breoganista o base estadounidense sofre "unha rotura non adutor longo da perna esquerda". Ademais explícase que o xogador esta sendo sometido a probas "complementarias" que son as que "determinarán o período que o xogador precisará para recuperarse". En principio poderíase estimar un período mínimo de dous meses.
Esta ausencia limita aínda máis as posibilidades do Cafés Candelas Breogán, que o vindeiro sábado, 20.30 horas no Polideportivo Govern Andorra, visita ao Morabanc Andorra con só unha opción: a de gañar para seguir sendo equipo da liga Endesa.
O conxunto local aínda ten opcións de clasificarse para os play off, aínda que tamén son remotas. Actualmente, o equipo que dirixe Ibon Navarro ocupa a décima posición da táboa con quince triunfos e dezasete derrotas. É dicir, sepárano dous triunfos do trío que conforman o Iberostar Tenerife, o Divina Seguros Joventut e o Tecnyconta Zaragoza; que ocupan os postos oitavo, sétimo e sexto, respectivamente. É máis, unha vitoria do Joventut nesta mesma xornada xa deixaría aos do Principado sen ningunha posibilidade. Pero o rival do Breogán non coñecerá ese resultado antes do seu partido, xa que o encontro do equipo de Badalona, que visita ao Baskonia, aprazouse ata o mércores 22 de maio debido a que durante esta fin de semana disputarase no Buesa Arena a final four da Euroliga.
Unha das características do Andorra nesta tempada é que practicamente conseguiu os mesmos resultados como local e como visitante. Nos desprazamentos logrou sete triunfos por nove derrotas, mentres que ante os seus afeccionados conseguiu o mesmo número de triunfos e de derrotas, oito.
O conxunto andorrano perdeu gran parte das súas opcións de disputar as eliminatorias polo título entre as xornadas 26ª e 29ª, xa que perdeu os catro encontros. Agora parecen recuperados desta mala serie, xa que venceron en dous dos últimos tres partidos e a derrota sufrírona a pasada fin de semana na súa cancha ante o Barça, pero de forma moi axustada (79-82).
O Andorra é un equipo que non brilla case en ningún apartado estatístico, xa que en case todos eles móvese dentro da media xeral da liga. Así é o sétimo en anotación (83 puntos de media), o noveno en puntos encaixados (82,1), oitavo en rebotes (34). As excepcións habería que buscala no seu discreto acerto nos tiros de tres puntos -décimo quinto con 35,1%-, a terceira posición en rebotes ofensivos (11,1) ou a segunda en recuperacións, onde os seus 7,2 roubos por encontro só os supera o Baskonia, cunha media de 8.
A nivel individual destaca a base canadense con pasaporte serbio Dylan Ennis, máximo anotador do equipo e o seu principal referente. A súa media de 13,7 puntos sitúano entre os sete mellores anotadores da competición. En canto a rebotes, os seus xogadores máis destacados son Moussa Diagné e Reggie Upshaw, con 6,1 e 4,2 capturas por encontro.
