O lucense Alberto Piñeiro, o Piña, chegou a ser campión de España no ano 2016 e un ano despois retirouse marcado por un accidente sufrido por un sparring que acabou falecendo. Agora lidera o club The Boxer Club Piña Team, unha escola de boxeo en Lugo situada no ximnasio AltaFit, que pertence ao grupo The Boxer Club e que segue o método Old School Boxing. Combina a técnica e a táctica do boxeo con adestramentos físicos de alta intensidade.
"Estamos a traballar no ximnasio AltaFit e unímonos a unha cadea que se chama The Boxer Club. Trabállase en cambiar a imaxe do boxeo e traballar con xente de todas as idades. Temos rapaces, imos comezar con nenos e tamén hai xente maior. A idea é que fagan este tipo de deporte para manterse en forma, é un deporte moi completo. O que se busca é traballar con xente sen contacto e pór máis de moda ao boxeo. Quitar esa imaxe que tiña este deporte asociado aos macarras. A nivel profesional é un deporte de risco, pero a idea é facelo como forma de adestramento porque é moi completo e ao alcance de calquera", explica Alberto Piñeiro.
O exboxeador lucense recoñece que ás veces éntralle a espiral da competición, pero todo iso queda xa afastado. "Sigo tendo esas ganas por seguir competindo, pero sei que é difícil e cada vez esa posibilidade afástase máis porque necesitaría volver adestrarme moito e é moi sacrificado. Esa ilusión téñoa un pouco de lado", di o deportista.
Alberto Piñeiro invita tamén a todo o que queira e o desexe a achegarse ata AltaFit para probar a experiencia e ver as súas sensacións. "O nome do club co que estamos a traballar é The Boxer Club Piña Team e o que queira vir probar pode facelo sen compromiso, non necesita traer luvas, deixámosllo aquí todo e sen compromiso. Temos uns horarios amplos e está a funcionar moi ben. Levamos 20 días abertos e xa pasamos os cincuenta socios", sinala.
O excampión de España explica, en primeira persoa, como é a súa vida actual e a súa dedicación despois de deixar de ser boxeador profesional. "O Alberto Piñeiro de agora dedícase a este proxecto por completo, traballo oito horas ao día nel, estou envorcado porque quero sacalo adiante e teño tamén unhas ideas en mente como unha carreira de obstáculos en Lugo que será para o ano que vén, nada relacionado co boxeo, pero si co deporte", comenta.
Alberto Piñeiro admite que se sente unha persoa moi feliz co que fai e máis cun respaldo tan importante detrás. "Para min isto non é traballar, estou a gozar, é algo incrible o vivir de facer o que che gusta e é porque do que sei realmente é disto", manifesta.
Finalmente, o Piña defende os valores dese deporte que cambiou a súa vida e agora éncheo plenamente. "O boxeo dáche uns valores, o resto, a disciplina, se queres algo tes que traballar para logralo, ensínache que todo costa e logramos o que queriamos".
