Diego Epifanio: "Xa estamos no momento que buscabamos"

O adestrador do Río Breogán, Diego Epifanio, felicitou este domingo o seu equipo pola vitoria e asegurou que non foi un "triunfo fácil" por ser a última xornada "e por todo o que había en xogo". O técnico do equipo lucense apuntou que os seus xogadores "fixeron un gran traballo no primeiro cuarto, algo que lles deu moita confianza, pero quitámonos a tensión, fomos capaces de gañar e creo que estamos no momento de forma que buscabamos".

Epifanio sinalou o bo facer do CB Almansa no segundo cuarto, "sobre todo con eses 12 puntos seguidos, catro tiplas que chegan logo dunha boa defensa, un erro e moita confianza no acerto por parte do rival".

Con todo, recordou que "acabamos a tempada segundos, empatados co primeiro pero gañando un partido máis que eles".

Sobre o seu rival nos play off, o Palma, Epifanio dixo que nos esixirá moito, porque é un equipo moi novo, con moito ritmo e talento individual". "Seguro que queren demostrar moito e porannos as cousas moi difíciles na pista", engadiu.

O técnico do Breogán finalizou a rolda de prensa explicando que, agora, "o obxectivo que nos marcamos é competir cada play off". "Non teño unha bóla de cristal, pero temos que controlar moitas variables como o aspecto mental, o físico e o táctico. Estamos entre os oito mellores equipos dunha competición que arrincou con 19. Seguimos na brecha e agora só espero que cada xogador do equipo dea o seu mellor nivel, que cada un ofreza o máximo agora que nos tocará xogar diante do noso público", finalizou.

RUBÉN PERELLÓ. O adestrador do CB Almansa, Rubén Perelló, felicitou o Río Breogán polo seu triunfo, e desexoulle "a mellor das sortes, e oxalá sexa equipo de ACB o próximo ano". O técnico do Almansa recordou que non se xogaba nada este domingo, pero que o seu equipo foi un "quebradizo de cabeza" para os adestradores rivais. "Somos un equipo moi valente en defensa e en ataque, pero o Breogán fixo o seu partido", concluíu Perelló.