O adestrador do Río Breogán, Diego Epifanio, afirmou que no partido deste mércores o Palma castigounos con "situacións de bloqueo directo", sobre todo "na primeira parte". "Na segunda parte estivemos mellor, competimos con eles, pero sabiamos que ía ser moi difícil porque teñen moito talento. Agora non queda outra que felicitalos e tentar prepararnos para o partido o sábado que para os dous é unha final", engadiu.
"Cando xogas un play off todos queren gañar e esa presión podémola ter todos. Si que é verdade que nós viñamos cunha idea de expoñer o partido para que a Kevin (Larsen) non se lle fixese moi longo. Pero na primeira parte tivemos moi malas porcentaxes de dúas e logo á hora da verdade fallamos algunhas canastras, non se se é pola tensión ou polo acerto do rival. Creo que fixemos un bo esforzo defensivo e en ataque non estivemos acertados nesas situacións que, se cadra, metendo un par de bandexas máis a situación fose outra".
Álex Pérez, técnico do Palma, comezou a súa rolda de prensa avisando: "Eu se fose Lugo estaría un pouco asustado. Despois do partido, de ver que Larsen non está a ritmo, de que non teñen tempo de descansar, de que nós mozos podemos estar bastante frescos, eu creo que podemos ir alí con opcións mesmo de pasar a semifinal". "Para nós é un premio estar no play off e forzamos un terceiro partido", engadiu.
