82-86. Derrota do Breogán da forma máis dolorosa

O Cafés Candelas Breogán desinflouse outra vez no último cuarto (82-86) dun partido que tiña encarrilado (chegou a ir gañando por 15 puntos a falta de 13 minutos) e que acabou en mans do Tecnyconta Zaragoza cando aos locais se lles acabou o acerto no tiro exterior, o seu grande aliado ata ese momento. Os zaragozanos, cun gran Berhanemeskel (22 puntos, 26 de valoración) no Pazo dos Deportes, levaron o salto inicial e os primeiros minutos do partido, nos que o Breogán estivo totalmente desacertado, especialmente Löfberg.

Cunha canastra de Justiz, outra de Barreiro e un triplo de McCalebb, o Zaragoza colleu impulso cun parcial de 0-7. Despois de case cinco minutos de seca e ata oito intentos errados por anotar, ao fin viu canastra Gerun. Dous tiros libres fallados de McCaleb animaron aos locais, que reaccionaron a base de triplos. Desde a liña de 6,75 anotaron Vidal, Cvetkovic e Redivo para porse a un (13-14, min.7).

Okoye tamén se animou cun tiro de tres e aínda que os maños sempre estiveron por diante no primeiro cuarto, o Breogán non permitiu que se escapasen (17-19).

O equipo local igualou con tiros libres de Jordan (19-19) no arranque do segundo acto e púxose por diante por primeira vez (22-19, min.11) cun triplo de Löfberg, que cambiara de cuarto con 0 de 5 en tiros. Redivo e Uriz converteron outros dous lanzamentos de tres (28-23, min.23), pero Berhanemeskel empuxou ao Zaragoza cos seus primeiros trece puntos (cento por cento de efectividade) e a axuda de Okoye (28-35, min.17) para un parcial de 0-12 e sete de vantaxe.

Os de Natxo Lezkano tiveron un apagamento de catro minutos, pero reaccionaron nos instantes previos ao descanso, ata o punto de neutralizar a diferenza (39-39) grazas ao seu xogo exterior, porque na pintura foi moi superior o equipo zaragozano.

O partido renovouse con tres tiros libres de Redivo e dous triplos de Cvetkovic (48-39, min.33) para volver pór por diante aos lucenses, que abriron brecha (nove arriba). Ademais, Justiz, clave no Zaragoza, sumou pronto dúas persoais para quedar a unha da eliminación. Porfirio Fisac mandou ao cubano ao banco e os locais chegaron á máxima diferenza de quince puntos (62-47 min.27) porque as súas bonecas renderon a distancia e os maños permitíronllo.

Os visitantes resistiron con Berhanemeskel e McCalebb, que achegaron 14 dos 18 puntos que anotou o Zaragoza no terceiro cuarto e que lle permitiron entrar nos últimos dez minutos a nove unidades do Breogán (66-57). Os de Porfirio Fisac entoáronse no último acto, o que máis lle adoita custar ao Breogán. Situouse a seis apoiado unha vez máis en Berhanemeskel (68-62, min.33), pero o equipo lucense non se puxo nervioso e volveu afastarse co seu acerto desde a liña de 6,75 (74-64, min.34) en lanzamentos liberados.

Zaragoza cambiou a defensa dous-tres e, aínda que Breogán sumou outro triplo, as súas porcentaxes baixaron e os maños metéronse no partido cun parcial de 4-13 (78-77, min.38) para igualalo cun tiro de tres de Okoye a falta de minuto e medio (80-80) e darlle a volta (80-82) xusto antes de entrar nos últimos sesenta segundos.

Os locais tiveron un último ataque para forzar a prórroga (82-84), pero nin Gerun nin Brown converteron e os maños levaron o triunfo.

O partido arrincou cunha homenaxe a Mirian Vázquez, a moza, colaboradora do club, que se converteu durante os dez últimos anos en símbolo da loita contra o cancro en Lugo e que falecía hai unha semana.