Números de importancia. A edición número 14 dos Xogos do Eixo Atlántico, que se celebran desde o pasado lunces -e ata o venres- na localidade portuguesa de Maia demostra o tirón indiscutible do deporte. Nada menos que 2.200 participantes de 28 delegacións reúnense nunha competición que rompe marcas.
Faltou o ano pasado a edición prevista por mor da situación sanitaria, pero unha vez superada os Xogos volveron con forza nun evento que se abriu co discruso da presidenta do Eixo Atlántico, a alcaldesa de Lugo Lara Méndez, acompañada por José Tomé e Xoan Mao.
Maia, Matosinhos, Gondomar, Bragança, Famalicãou, V.N. de Gaia, Vila Real, Peso dá Régua, Valongo, Braga, Barcelos, Viana do Castelo, Santa Maria dá Feira, Amarante, Guimaraes, Póvoa de Varzim, Lugo, Ourense, Carballo, O Barco de Valdeorras, Pontevedra, Monforte de Lemos, Ponteareas, Vilagarcía de Arousa, A Coruña, Sarria, Santiago e Vigo participan nesta edición.
Lara Méndez, que se desprazou ata Maia, destacou o crecemento dun evento deportivo que, dixo, "máis aló de promover a práctica deportiva como un complemento indispensable da formación para a mocidade, contribúe a cohesionar os municipios do noroeste peninsular". Os Xogos do Eixo Atlántico crean, segundo a presidenta do organismo hispano-luso, "un espírito de confraternización que permite aos veciños recoñecerse como amigos dentro desta gran familia do Eixo Atlántico".