O CD Lugo informou este venres do positivo en covid-19 dun xogador do primeiro persoal, que xa está illado. O resto de membros do equipo sometéronse a un cribado.
Tras detectarse o contacto deste xogador cuxa identidade non revelou o club con outro caso positivo, o CD Lugo activou o seu protocolo conxunto coa LaLiga, illando de inmediato ao membro afectado. "Tras a realización da proba PCR, que resultou positiva, este pasou a corentena, tal e como marca o protocolo establecido pola autoridade competente", informa o CD Lugo nun comunicado.
O futbolista atópase "ben" e está illado sen contacto algún co resto de integrantes do primeiro persoal. O CD Lugo mídese este luns ao Fuenlabrada.