O Lugo volve camiñar de novo para cumprir unha folla de ruta na que deu o seu primeiro paso firme. A espantada de Víctor Moreno e Francisco Rodríguez obrigou ao club branquivermello a empezar na casa de saída por cuarto ano consecutivo. O primeiro dado tirouno o presidente lucense, Tino Saqués, coa contratación de Emilio Viqueira para substituír a Moreno na dirección deportiva. O seguinte ‘cinco' no particular parchís do verán na cidade amurallada será a chegada dun técnico que supla a Francisco.
A firma dun responsable da parcela deportiva era unha condición sine qua non para avanzar polo taboleiro do mercado estival. Ata o 31 de agosto o Lugo terá que ter fortuna, acerto e unha boa estratexia para afrontar con garantías unha travesía pola Segunda División que se presenta máis esixente que nunca na tempada 2018-2019.
Na próxima campaña o cadro branquivermello competirá nunha división complicada tras o descenso do Deportivo, As Palmas e Málaga, o ascenso do Mallorca e a permanencia de equipos como o Granada, o Oviedo ou o Zaragoza, entre outros.
A próxima campaña o Lugo competirá nunha división complicada pola entidade dos equipos de Segunda
Asinar a un adestrador será o seguinte paso a dar. Para iso, Tino Saqués e Emilio Viqueira xa manteñen un diálogo fluído para deixar unha terna de tres ou catro candidatos para ocupar o banco do Ángel Carro. Entre esas opcións haberá diferentes niveis. No primeiro estarán os favoritos de mandatario e responsable deportivo. Aí xorde un nome, o de Curro Torres, que xa ocupou esa mesma posición a pasada campaña nunha terna con Lluis Planagumá e Francisco Rodríguez para que fose o almeriense o elixido tras a rolda de entrevistas.
Torres segue no caderno de Saqués, que non se esquece do paso do exlateral internacional da Valencia pola filial valencianista e as primeiras xornadas co Lorca.
O principal nome que aparece nas quinielas para ser o novo entrandor do Lugo é o de Curro Torres
Xunto a Curro Torres aparecerán os novos nomes froito do coñecemento do mercado de Emilio Viqueira, cuxa valía quedou demostrada no seu paso de cinco anos polo Nástic de Tarragona, onde contou con Santi Castillejo —actualmente no Ascó da Terceira División catalá—, Vicente Moreno —que acaba de ascender co Mallorca e dirixirao en Segunda a próxima campaña—, Juan Merino —libre tras non acabar a tempada no Córdoba—, Nano Rivas, Lluis Carreiras —ambos os libres— e Antonio Rodríguez ‘Rodri', quen acaba de asinar polo L'Hospitalet.
O perfil de técnico que se busca sería o similar ao dos últimos anos desde a chegada de Quique Setién: un preparador que opte polo xogo ofensivo, con gusto polo fútbol posicional e que poida sacar partido a un persoal confeccionado para realizar ese tipo de xogo. Aí entraría un perfil similar ao de Carreiras, quen realizou tres boas tempadas no Sabadell e pasou despois sen o mesmo éxito polo Mallorca, o Zaragoza e o Nástic.
Unha vez incorporado o adestrador pasarase a estudar os reforzos a levar a cabo entre o director deportivo e o preparador que afrontase a 2018-2019, tal e como asegurou o propio Tino Saqués na despedida de Víctor Moreno.
Na actualidade o Lugo conta con 16 fichas máis a incorporación do centrocampista Hugo Rama, que procede do Cerceda. Polo tanto, no caso de que non haxa saídas inesperadas —como pode ser a do porteiro Juan Carlos, con ofertas de equipos de Segunda e do estranxeiro—, as chegadas serían entre 6 e 7 para contar con 23 ou 24 xogadores no persoal.
