O pentatleta vivariense Cristóbal Rodríguez Fidalgo conseguiu en Budapest a clasificación para a final da Copa do Mundo, que se disputa este domingo na capital húngara. Este novo éxito invita o optimismo en canto ás opcións do mariñán de acudir aos Xogos Olímpicos de Londres 2012.
O deportista lucense conseguiu o billete para a fase final da Copa do Mundo na proba disputada en Budapest, na que concluíu na novena praza do seu grupo (clasificábanse os doce primeiros) con 4.460 puntos.
Os españois Aleix Heredia e Jaime López non tiveron a mesma sorte que Cristóbal Rodríguez nesta competición. O primeiro terminou vixésimo sétimo no grupo do mariñán, e o segundo foi vixésimo segundo no seu grupo.
A de Budapest foi a terceira proba da Copa do Mundo de pentatlón. A seguinte disputarase do 26 ao 29 de maio en Chengfdu (China).
