O próximo rival do Leche Río Breogán, o Força Lleida, protagonizou este domingo a gran sorpresa da décimo quinta xornada, antepenúltima da primeira volta, da LEB Ouro. O equipo catalán, que se atopa situado na táboa en zona de descenso, acudía á súa cita co B Travel Brand Mallorca con só catro triunfos no seu marcador. Finalmente, o equipo que dirixe desde hai un par de xornadas Gustavo Aranzana impúxose desde o primeiro momento e con certa claridade aos baleares, sobre todo grazas á excelente actuación do escolta Steven Santa Ana, autor de 28 puntos con oito triplos sen fallo, e do pivote Shaquille Cleare, que sumou 25 puntos e capturou 9 rebotes.
Curiosamente, o último encontro que perdeu o Mallorca foi hai tres xornadas, tamén en propia cancha e fronte a outro equipo que ocupaba, e segue ocupando, unha praza de descenso na clasificación da LEB Ouro, o Canoe.
Este resultado sumado á derrota do Palencia, que leva tres partidos perdidos de forma consecutiva, na cancha do Levitec Huesca propicia que o Breogán iguale no número de triunfos o Mallorca e que estes dous equipos, xunto co Leyma Coruña, sexan os máis inmediatos perseguidores de Valladolid e Delteco Gipuzkoa, que con doce triunfos, dous máis que baleares e lucenses, lideran a clasificación da segunda categoría do baloncesto español.
AS OPCIÓNS. Con dúas xornadas para o final da primeira volta ábrese unha pequena posibilidade para que o Leche Río Breogán poida disputar a Copa Princesa. Tendo en conta que na próxima xornada se van a enfrontar os dous equipos que lideran a clasificación, sería necesario que o que perda este partido tamén o faga no seu enfrontamento da última xornada, onde o Valladolid xogará en Huesca e o Delteco Gipuzkoa farao en propia cancha ante o Cáceres.
A facilidade anotadora do conxunto lucense, a pesar de que durante algunhas xornadas as súas porcentaxes nos lanzamentos non foron precisamente destacadas, confírmase tamén polo feito de que o de Diego Epifanio é o equipo que máis utiliza o lanzamento triplo (levan 405 intentos realizados fronte aos 402 de Mallorca ou Canoe) pero faino coa mellor porcentaxe da competición.
Un 39,5 por cento de acerto no triplo
As 160 canastras triplas anotadas polos xogadores do equipo breoganista implican unha porcentaxe do 39,5 por cento, un acerto ao que só se lle achega o Huesca, neste momento cun 37,5 por cento.
En canto aos tiros de campo, o conxunto breoganista, cun 47,9 por cento, só é superado neste momento polo Palencia, que goza dun 48 por cento.
O conxunto lucense tamén está obrigado a gañar os seus dous partidos, o do próximo venres en Lleida e posteriormente o que disputará no Pazo dos Deportes ante o Almansa, e ademais superar nestas dúas xornadas a diferenza que ten no basquetaverage xeral cos equipos que o preceden. Así, o Mallorca, que nas dúas últimas xornadas visita o Almansa e recibirá o Tau Castelló, cun saldo favorable de 103 puntos supera o Breogán en 10 puntos; o Palencia con 109 faino en 15 puntos e o Valladolid, con 25.
O Breogán retorna este luns aos adestramentos nunha semana atípica, polas datas do Nadal, e moi curta, xa que o encontro de Lleida disputarase o venres 3 de xaneiro ás 21.00 horas. O conxunto catalán, a pesar do resultado deste domingo, completou unha campaña deficiente que o levou a ocupar nestes momentos a antepenúltima posición da táboa, é dicir, un dos tres postos de descenso.
Esa traxectoria levou o conxunto catalán a prescindir do técnico Jorge Serna, que foi substituído por Gustavo Aranzana. Este debutou a pasada xornada ante o Melilla, partido que se saldou cun claro triunfo norteafricano (72-101). Tamén o club catalán decidiu rescindir o contrato co escolta de Bahamas Mike Carey, polo que é previsible que nos próximos días poida haber unha nova incorporación no conxunto catalán.
