Ao final parece que todo vai quedar nun susto, un máis destes tempos tan estraños de covid, pero o certo é que durante unhas horas saltaron as alarmas no Río Breogán, xusto logo de saberse que dera positivo en coronavirus un dos xogadores rivais do Granada na final da LEB Ouro, que ademais foi dos que máis minutos disputou no choque decisivo do pasado domingo. Este xoves xa eran varios os casos no plantel e corpo técnico, segundo informa El Ideal.
A existencia dese primeiro contaxio no Granada fixo que se activasen os protocolos sanitarios e que, de inicio, todos os xogadores, técnicos e demais persoal desprazado á capital andaluza tivesen que quedar nas súas casas sen poder saír por precaución. A primeira consecuencia foi que os actos promocionais previstos para estes días cos patrocinadores do conxunto celeste, recentemente ascendido a ACB tras unha emocionante final, fosen suspendidos.
Tras o confinamento preventivo, as correspondentes PCR. Os que viaxaron a Granada fixéronse as probas e a última hora da noite deste mércores, todas foran negativas, a falta de coñecer o resultado de só dous. Trátase de dous traballadores que se atopan confinados por precaución.
O deportista do Granada contaxiado, un dos que máis minutos disputou, posiblemente xogou enfermo sen sabelo
Por iso, os deportistas estranxeiros que xa tiñan comprado o billete cara aos seus países si puideron viaxar, ao contar cunha PCR negativa. Iso si, xa non poderán participar nos aprazados actos promocionais, como previra o club.
O integrante do Granada contaxiado (ao parecer tamén o está algún membro do equipo técnico) posiblemente xogou enfermo o partido sen sabelo, a pesar de pasar
O protocolo fixa que son contactos directos todos aqueles que estiveron preto del sen máscara, é dicir, todos os xogadores do equipo rival, aínda que posiblemente non os técnicos nin o resto do persoal, que normalmente están con máscara o maior tempo posible, aínda incluso no propio partido. O feito de que todos os xogadores lucenses desen negativo tamén elimina un problema que puido ser moito máis grave: que tivesen que someterse a probas as decenas de afeccionados que acudiron ás celebracións no Pazo e no Concello, o pasado luns, e que estiveron en contacto con eles. Por fortuna, os negativos do equipo celeste eliminan totalmente esta sospeita e dáse por descartada a posibilidade dun brote.
