O presidente do Club Fluvial de Lugo, Tito Valledor, o presidente da Real Federación Española de Piragüismo (RFEF), Román Mangas, e o alcalde de Portomarín, Juan Carlos Serrano, presentaron nesta localidade lucense a Copa de España de Novas Promesas Infantil, unha competición que se celebrará este sábado.

"Estamos moi contentos de poder estar no encoro de Portomarín nunha proba de gran relevancia. Estamos ledos de poder participar na dinamización desta zona moi importante para o piragüismo. Sen a colaboración do Concello, pola súa aposta por este encoro, e dá Xunta de Galicia pola cesión destas instalacións, sería complicado poder desenrolar este tipo de probas", considerou Tito Valledor.

"Neste ano, practicamente fóra dous centros oficiais non se farán competicións oficiais de piragüismo por temas de covid. Esta será a única proba que se celebrará a nivel nacional fóra de instalacións oficiais e será en Portomarín", dixo Valledor.

"Para Portomarín supón volver estar no calendario nacional desde o ano 1974. Isto é todo un orgullo para nós que teñamos este campionato despois de tantos anos", manifestou o alcalde deste concello lucense, Juan Carlos Serrano.

Traer este importante evento a Portomarín foi un traballo duro levado a cabo polo Fluvial, o propio concello e a Xunta, ademais da Real Federación Española de Piragüismo (RFEP).

"Por méritos propios Portomarín merece entrar neste circuíto, pero hai un gran traballo detrás. Hai case dous anos que levamos traballando para poder chegar a este obxectivo e non nos imos a quedar aquí. Coa colaboración de xente do Club Fluvial e do Concello, xunto con xente da Xunta e a Deputación, apostaremos por esta zona e este lugar tan importante, que é excepcional para facer piragüismo e que sexa un centro de referencia a nivel nacional", observou o presidente do Fluvial.

"Tiñamos intención de traer esta regata a Portomarín. é bastante complicada de organizar, sobre todo dúas saídas, unha de 174 deportistas en infantís A e outra de 135 en infantís B. Para as demais saídas imos ir perfectamente co circuíto. Imos pensar en que imos ter entre 200 e 220 metros de ancho, que será válido para que caiban todos", indicou o presidente da RFEP, Román Mangas.

"Imos conseguindo as cousas nos últimos tres anos, nos que construímos todo isto desde cero. Estou contento por facer este evento importante, por ter un centro de adestramento como o que temos aquí en Portomarín para sacar os campionatos adiante e por levar a cabo esta regata, coa que teremos unhas condicións óptimas para que os deportistas poidan adestrar, que sigan facendo eventos e seguir cada vez traballando con máis calidade e máis cantidade", declarou Mangas.

Este sábado levarase a cabo unha proba co máximo respecto aos protocolos covid-19, un reto "importante" que se cumprirá, segundo Tito Valledor. "O traballo foi difícil, como todo o que se fixo desde que comezou a pandemia, pero extremamos as medidas de seguridade e seguiremos a facelo o sábado. Será complicado, pero vos retos serán importantes para afrontalos e creo que o estamos a cumprir".

Probas como a Copa de España de Novas Promesas Infantil contribuirán á dinamización da zona. "Facer estas probas nestes concellos lucenses axuda a facer canteira. Hai que recoñecer que Lugo, aínda que ten unhas zonas excepcionais para adestrar, no inverno, cando veñen as riadas non se pode adestrar. O máis próximo para poder adestrar é Portomarín. Tamén outros concellos como Taboada ou Chantada xa no seu día foron referentes. Son sitios marabillosos para dinamizar a provincia", considerou Valledor.

"É importantísimo volver recuperar a economía nas familias e en todo a este pobo que está acostumado a acoller xente polo Camiño Francés. Agora tocaranos acoller a deportistas, pero estaremos todos á altura para que todas as familias e vos deportistas marchen contentos de aquí para que poidan vir as veces que queiran", indicou o alcalde de Portomarín.

Participación de marca

A competición inclúe un total de 14 regatas coa presenza de 834 embarcacións

A Copa de España de novas promesas infantil sobre 3.000 metros que acollerá Portomarín supón a presenza dunhas 834 embarcacións, pertencentes a 85 clubs de 16 comunidades autónomas. En definitiva, un número máis importante e tamén cun nivel moi destacado porque se espera a presenza de os mellores padeeiros destas categorías a nivel nacional e un programa de catorce regatas.

A cita arrincará ás 10.00 horas coas finais de c-1 infantil A e B feminino e concluirá ás 20.00 horas coa disputa da final do k-2 mixto. Entre medias disputaranse as finais de k-1 infantil B feminino (10.30 horas), k-1 infantil B masculino (11.00 horas), k-1 infantil B masculino (11.00 horas), k-1 infantil A feminino (11.30 horas), c-1 infantil A e B (12.00 horas); e pechará a sesión matinal a final do k-1 Infantil A Masculino (12.30 horas).

O programa de competición da tarde arrincará coa regata do k-2 infantil B feminino (16.30 horas), á que seguirán o c-2 infantil B masculino e feminino (17.00 horas), o k-1 infantil A feminino (17.30 horas), o c-2 infantil A masculino e feminino (18.00 horas), o k-2 infantil B masculino (18.30 horas), o k-2 infantil A masculino (19.00 horas) e como penúltima proba o c-2 infantil Mixto (19.30 horas).