O Breogán empezou este luns a súa pretemporada nunha tempada moi esperada por equipo e afección debido á volta á máxima competición nacional, a ACB. Paco Olmos dirixiu este primeiro adestramentono que foi a primeira toma de contacto do equipo.
Este martes é o primeiro adestramento conxunto na súa totalidade, xa que o luns, como dixo Olmos: "Foi a primeira toma de contacto coa cancha, de xeito individual. Mañá xa adestraremos en conxunto".
Sobre a chegada a Lugo e os días previos a esta pretemporada, o valenciano dixo que "tivemos a fortuna de poder chegar a semana pasada para aclimatarnos á nosa nova vida, tanto a nivel persoal como profesional, e todos os xogadores dispoñibles puideron pasar con éxito as probas médicas e tomaron contacto coa cancha".
Tanto Olmos como os xogadores agarran con moitas ganas e ilusión esta nova tempada, e á súa vez, este reto de xogar na máxima categoría nacional, na que contan cun persoal cheo de caras novas, a maioría con experiencias previas en liga ACB, e cun grupo que se ve unido e centrado no seu obxectivo de manterse na categoría.
Paco Olmos conta cun persoal reducido, na que faltan Lukovic, Sollazzo e Sakho
En canto aos xogadores dispoñibles, o técnico explicou a situación actual do persoal, na que faltan tres xogadores, ademais do lesionado Seydou Aboubakar, que "ten que estar un tempo importante, duns dous meses, fóra das canchas", pero que se que estivo presente no adestramento, apoiando ao grupo.
As tres baixas son a da á-pivote serbio Marko Lukovic, a do escolta estadounidense Adam Sollazzo e a do pivot congoleño Jordan Sakho.
Sobre estas ausencias falou Paco Olmos, que explicou: "Marko vacinábase hoxe (polo luns), e tiñamos que deixar que se vacinase, e vai chegar entre a noite de hoxe (polo luns) e as primeiras horas de mañá (por este martes), Adam, que foi a última incorporación, está xa voando para aquí, e Jordan está nun compromiso internacional coa súa selección".
Ademais dos xa asinados, tamén adestra co grupo Mateo Díaz, cuxo futuro aínda é incerto, pero do que se espera que salga cedido para seguir mellorando e para "acumular minutos de xogo, que é moi importante para os xogadores novos".
O conxunto breoganísta comezará a rutina de adestramentos propia de pretemporada, coa mirada posta no día 21, onde se inician os amigables nun torneo celebrado en Xixón.
NOVOS COCHES. As novas fichaxes que xa se atopaban en Lugo, xunto a Kevin Larsen e Mindaugas Kacinas, acudiron este luns a Ditramotor no Ceao, para recoller os seus novos coches nun acto no que se viu a Bell-Haynes, a Musa, a Mahalbasic e a Kalinoski, ademais de Paco Olmos, que atendeu aos medios.
No que respecta ao obxectivo propiamente devandito, o técnico valenciano fixo fincapé en conseguir vitorias e intentar evitar sufrir no último tramo de competición. "Non hai que facer contas, senón xogar cada día para sumar unha vitoria ata conseguir o obxectivo, e o que podamos facer antes mellor, porque as présas son malas conselleiras".
De face aos partidos de pretemporada, falou de que "quero ter o maior numero de partidos ante rivais ACB para coller experiencia, xa que temos xogadores que veñen de LEB Ouro que nunca xogaron na máxima categoría española. Ao final serán oito partidos, e sete contra rivais ACB, o que é moi bo, xa que nos dará o ritmo, e o baremo da liga na que imos xogar".
Sobre o calendario que lles tocou, no que se enfrontarán nas primeiras xornadas a rivais como Lenovo Tenerife, San Pablo Burgos, Barcelona ou Real Betis, Paco móstrase sereno.
SORTEOS. Di que "ao final hai que xogar contra todos". Seguindo co tema, comenta: "Temos que ver como son os sorteos das competicións europeas, a ver cando xogamos contra os equipos de Europa, onde xogan ou de onde veñen, creo que hai xente que prefire xogar primeiro contra os grandes, logo no medio, pero ao final nosostros mirámonos a nós mesmos".
Sobre a actitude para afronta os partidos, e sobre o inicio, fala de pensar "que cada partido é o noso último partido e xogalos todos coma se fosen unha final. Empezamos contra un grandísimo equipo, para o meu a revelación".
