O sorteo da final a catro da Copa do Rei xuvenil deparou as cruces, en semifinais, do Real Betis co Real Madrid e do RCD Espanyol co RC Celta de Vigo, equipos que loitarán polo título a próxima semana, do 13 ao 16 de abril, no Ángel Carro de Lugo.
A sede da Deputación de Lugo acolleu o sorteo, no que o deputado provincial de Deportes, Efrén Castro, e o concelleiro de Deportes de Lugo, Mauricio Repetto, exerceron como mans inocentes.
A primeira bóla en saír foi a do Betis, catro veces campión do torneo, que actuará como local no campo do Lugo na eliminatoria ante o Real Madrid, que ten trece títulos da Copa do Rei xuvenil.
A outra semifinal emparellou ao Espanyol, con catro títulos, o último en 2012, e o Celta de Vigo, único dos sobreviventes que non gañou esta competición.
O Campionato de España Xuvenil-Copa de SM o Rei non se disputaba desde 2019 debido ás restricións pola pandemia. O último vencedor foi o Vilarreal, que derrotou por 3-0 na final ao Atlético de Madrid, disputada no estadio Antonio Peroles de Roquetas de Mar (Almería)
Os catro clasificados superaron tres eliminatorias a partido único para estar na fase final de Lugo. En cuartos o Betis venceu a domicilio ao Atlético de Madrid e o Espanyol ao Levante, en tanto que como locais gañaron o Real Madrid ao Tenerife e o Celta ao Granada.
O seleccionador nacional sub-21, Luis de la Fuente, asegurou na presentación que este torneo "ten un tirón moi importante" porque nel participan os "xogadores que son o futuro do fútbol español".
