Deporte Local Lugo
Os positivos por covid no plantel do Lugo dificultan o comezo de tempada
O Lugo 2021/2022 botou a andar este xoves en Pol. O adestrador branquivermello, Rubén Albés, afirmou que o "obxectivo" de seguir en Segunda División ten que ser "firme desde o inicio" e sinalou que espera a chegada de fichaxes que incrementen "a competitividade e as alternativas".
"Empezamos a pretemporada e trataremos de que sexa esixente, e construír un equipo sobre os valores que ten o Lugo. A partir de aí, ir desenvolvendo o noso modelo, ir incorporando futbolistas que nos vaian incrementando o nivel de competitividade e alternativas", comentou en declaracións que facilitou o club.
|TV|📽️
👉Lembra as primeiras palabras do míster @RubenAlbes no comezo da pretempada 21/22!#ForzaLugo#Pretempada2122 pic.twitter.com/UJjMAmd7zn— Club Deportivo Lugo (@CDeportivoLugo) July 8, 2021
O técnico que obrou a tempada pasada o milagre da permanencia do Lugo na categoría de prata precisou que as pretemporadas están para "tentar chegar da mellor maneira posible ao comezo" da competición, a mediados de agosto.
"Todas as tempadas son esixentes en Segunda e o obxectivo de seguir un ano máis nesta categoría ten que ser claro e firme desde o primeiro momento. Temos que ser conscientes desa realidade", sostivo.
Albés dixo que cre "moito no traballo, nos futbolistas", e destacou que "a base de xogadores" que ten o CD Lugo conta con "experiencia" e tamén con "mocidade e fame para crecer". De momento, as caras novas son as dúas incorporacións confirmadas –David Mayoral e Juan Antonio Ros– e os tres cedidos que regresan: Lebedenko, Sebas Moyano e Vesprini
"Vin caras alegres, xente optimista, con bo carácter, con ganas de traballar, xente que ten moitísima responsabilidade por levar o escudo do Lugo e sobre iso é moito máis fácil construír o táctico e un sentimento de equipo", agregou.
Albés congratulouse de renovar o seu contrato co Lugo para esta tempada despois de lograr o curso pasado que o equipo quedase en Segunda División. "É onde quería estar e estou feliz. O ano pasado vivimos situacións que se converteron en algo máxico", confesou o técnico galego.
🖋 Firma da renovación do convenio entre o #CDLugo e @HospitalPolusa
— Club Deportivo Lugo (@CDeportivoLugo) July 8, 2021
💪Unha tempada máis facendo equipo! ⚽️🩺 #ForzaLugo pic.twitter.com/TNhYuCd8yb
O presidente do Lugo, Tino Saqués, afirmou que coa pretemporada na localidade lucense de Pol, o conxunto galego pretende "facer equipo, familia" e empezar a campaña con "enerxía".
"Afrontamos a tempada con ilusións renovadas, esperando moitas emocións e esperemos que non teñamos moitas complicacións despois da tempada pasada na que tivemos de todo, con lesións polo camiño", explicou en declaracións que difundiu o club tras renovar o convenio coa clínica Polusa Ribera.
Saqués indicou que a pretemporada ten como escenario "unha paraxe incomparable", onde o corpo técnico e os xogadores poden "gozar da natureza" e quedaron " alucinados ao ver a contorna".
Avogou por aproveitalo e "facer grupo e unha piña" no vestiario porque o obxectivo é "facer familia" e prepararse "para a tempada, para comezala con carga e enerxía".
