O Promociones Díez Rical de Miranda proclamouse campión de Copa Princesa de Asturias ao imporse (2-3) á Agrupación Deportiva A Pinguela en Monforte, nun partido cheo de alternativas. Os numerosos erros cometidos polas xogadoras locais nos momentos decisivos do partido foron a clave da derrota.
O conxunto monfortino controlou os primeiros compases do xogo con cómodas vantaxes. Ata o 22-20. A partir de aí, o Miranda púxose por diante (23-24), e ata desaproveitou dúas bólas de set. Non a terceira (25-27).
No segundo acto do partido, A Pinguela saltou á pista cunha maior dose de tensión en defensa e concentración en ataque. Dúas armas que foron condimentos suficientes para non dar opción ao conxunto rival. Un parcial de 5-0, favorable ás monfortinas, levou o xogo do 7-7 ao 12-7, e dous máis de tres a cero selaron o xogo en tan só 21 minutos (25-14).
Do branco ao negro, do claro ao escuro. Así é A Pinguela. Ao conxunto monfortino apagáronselle as luces de saída. Cedeu un parcial de 0-7 e non foi capaz de remontar o voo: 21-25.
No intercambio de refachos, á Pinguela tocoulle golpear no cuarto set. Cun inicio demoledor, as pupilas de Prokopovich encarrilaron o set sen problemas (25-15 en 21 minutos).
E no último set, o Promocións cometeu menos erros e anotouno por 15-13. Sempre foi por diante o conxunto visitante. Con 13-14 tivo aínda a súa ocasión A Pinguela, pero un novo erro en ataque fixo que o punto 15 subise ao marcador do Miranda.
Ao termo do partido procedeuse á entrega de trofeos, acto presidido por Agustin Martin, presidente da FEV, que entregou a Copa ao equipo do Miranda, o subcampeonato á Pinguela e o trofeo de mellor xogadora a Melissa Calo, do Promocións.
