O ano no que o Breogán foi mellor que o Real Madrid

Desde aquel 101-57, resultado que se produciu no primeiro enfrontamento oficial entre o Real Madrid e o Breogán, disputado o 18 de outubro de 1970, ata o 94-89 do último enfrontamento, tamén na capital de España, xogado o 27 de abril de 2019, foron 46 as ocasións nas que se enfrontaron ambos os equipos. Aínda que a diferenza de potencial entre ambas as entidades é evidente, polo menos a nivel de resultados as abismais diferenzas que se manexaron nos primeiros enfrontamentos reducíronse de forma notable. Incluso con vitorias breoganistas, un total de seis, e co sorprendente feito de que nunha ocasión, na tempada 2002-2003, o equipo de Lugo acabou a tempada superando na clasificación ao coloso branco. Todo un fito.

Tiveron que enfrontarse previamente en 21 ocasións para que o 13 de xaneiro de 1991 chegase a primeira vitoria breoganista, no Palacio Municipal dos Deportes de Lugo (81-67). Atrás quedaran as auténticas malleiras recibidas polo conxunto lucense na década dos 70, como aquel recordado 140-48 do 8 de febreiro de 1976 que endosaron os xogadores de Pedro Ferrándiz no que foi a maior derrota histórica do equipo lucense e o partido no que se conseguiu a máxima anotación individual na historia da máxima categoría do baloncesto español, os 65 puntos logrados polo estadounidense Walter Szczerbiak.

PRESUPOSTOS E PÉRDIDAS. Con todo, os enfrontamentos do Real Madrid e Río Breogán xa non adoitan ser tan plácidos para os da capital de España. De feito, dos últimos seis encontros que disputaron en Lugo na metade deles a vitoria foi para os breoganistas. Un mérito indubidable para un club modesto como o Breogán que, hai que dicilo, do mesmo xeito que o resto dos equipos que compoñen a ACB ten que competir en desigualdade de condicións ante Madrid e Barcelona que se nutren dos ingresos do fútbol, e por certo sen que ningunha desas entidades sexan sociedades anónimas. Isto tradúcese nun dato demoledor, nos cinco últimos exercicios pechados, segundo fontes do Español, as perdas da sección de baloncesto do Real Madrid van desde os 19.477.000 euros da tempada 2016-17 ata 27.912.000 euros da 2019-20. é dicir, só as perdas desa última campaña do club branco son once veces máis que o orzamento total do Breogán.

Dos seis últimos duelos entre ambos en Lugo, os lucenses gañaron a metade

Aínda así, o Río Breogán, ademais de competir todos os partidos xogados neste século e de chegar a derrotar en seis ocasións aos brancos, conseguiu a proeza de finalizar a tempada 2002-03 por diante na clasificación. Naquel ano, o equipo que dirixía Andreu Casadevall finalizou na novena praza –gañou oito dos últimos dez encontros, o que lle permitiu chegar á última xornada dependendo de si mesmo, na que tiña que gañar en Manresa, para clasificarse para o play off polo título– e o Real Madrid na décima, ambos co mesmo número de triunfos (17) pero co average para os lucenses, que gañaron ao cadro que dirixía Javier Imbroda, nos dous partidos da fase regular (77-81 en Madrid e 88-78 en Lugo).

Esta inesperada situación clasificatoria supuxo posteriormente unha polémica circunstancia, xa que a organización da Euroliga dirixiu unha invitación para participar na Uleb Cup –naquel momento a segunda competición da organización europea– ao Real Madrid, obviar ao club lucense. O presidente do Breogán naquel momento, Francisco Moure Bourio, non dubidou en denunciar o "trato de favor" recibido polo club branco e anunciaba unha protesta formal ante a ACB, xa que como recordaba "as normas de competición da ACB recollen ben claro que se se producen vacantes nos torneos continentais proverase ao equipo mellor clasificado na liga" do conflito, sinalando que a Euroliga era autónoma para tomar as súas decisións e que a invitación ao Madrid tiña a súa orixe no "prestixio internacional".

As perdas do Madrid superan en once veces o orzamento do Río Breogán

Por se a situación non fose suficientemente tensa, a Federación Española de Baloncesto, que presidía José Luís Sáez e estaba enfrontada á ACB, como a Fiba coa Euroliga, non tardou en cursar unha invitación ao Breogán para que tomase parte na liga Europea Fiba, que xogaba a súa primeira edición. Pero a entidade celeste, para evitar un enfrontamento coa propia ACB, non aceptou a invitación do organismo federativo.