Lugo e Sarria serán as sedes do campionato de España infantil que se celebrará entre o 9 e o 15 de xuño. Segundo o sorteo, celebrado este luns, o Estudantes de Lugo quedou encadrado no Grupo G xunto ao campión de Estremadura, o Guadalupe, o segundo de Aragón, o Azulejos Moncayo CBZ e o terceiro canario, a Gran Canaria.
O calendario da competición e a composición dos grupos foi sorteado este luns nun acto que contou coa presenza do ex xogador do Real Madrid de baloncesto Fernando Romay, os concelleiros de Deportes do Concello de Lugo e Sarria, Miguel Fernández e Efrén Castro, respectivamente, xunto co presidente da da Federación Galega de Baloncesto, Francisco Martín, e Jesús Lázare, presidente do Estudiantes.
No Grupo A competirán o primeiro clasificado da comunidade de Madrid, o Real Madrid; Castela e León, o San Agustín Cuéllar e Aragón, o Tecnyconta Zaragoza, ademais do segundo de Valencia, o Benidorm.
No Grupo B estarán os campións de Cataluña, o Joventut; de Andalucía, o Betis; e de Valencia, a Valencia Básket, ademais do subcampión de Castela e León, que sairá do duelo entre o Colexio Leonés e o Básket León.
No C saltarán á pista en Lugo e Sarria os primeiros de Canarias e Baleares, o Maduct Canarias e o La Salle Palma. Ademais, competirán os segundos de Cataluña, o Barcelona, e de Andalucía, o Unicaja.
O Grupo D estará formado polos gañadores en Murcia, o Ucam, e o País Vasco, que aínda está por determinar. Tamén estarán neste campionato o segundo de Canarias, o La Salle A Lagoa e o terceiro catalán: o Sant Josep.
O Grupo E fórmano o Estudiantes -segundo en Madrid-, os campións cántabro, o CBT Pescadería Nacho de Torrelavega, e de Melilla, o Enrique Soler, xunto co segundo de Castela A Mancha, o Alkasar.
No F sairán o Fuenlabrada (terceiro de Madrid), o Rosalía de Castro, campión galego, e os primeiros de Navarra, o Larraona, e manchego, o Criptana.
Para rematar, o H estará composto polo primeiro de Asturias, o Centro Asturiano Oviedo, o segundo do País Vasco, por determinar; de Galicia, o Básquet Coruña, e de Baleares, o San Agustín de Palma.
