O persoal do Leite Río Breogán, incluído Salva Arco, que non puido xogar en Oviedo, volveu aos adestramentos –Ahonen exercítase á marxe do grupo– a excepción do xogador que deu positivo, ao que se lle realizou este luns unha nova PCR. De ser o resultado negativo, incorporaríase este martes mesmo ás sesións de preparación.
Momentos excepcionais, como os actuais, esixen medidas extraordinarias. Por iso, non caben lamentacións, nin sinalar que non se dan as mesmas condicións para todos os equipos. é isto ou a nada.
Hai equipos que teñen respaldo desde as bancadas, con máis de mil persoas nalgún caso, e outros xogan a porta pechada, tamén que mentres uns conxuntos non viron alterado o seu calendario outros tiveron que suspender os seus encontros e incluso, como foi o caso de Tizona e Leite Río Breogán, de ver totalmente interrompida a súa preparación nada menos que durante dez días o que xera un dano evidente, e máis cando se produce no mesmo inicio de competición, na preparación e ritmo do equipo.
O plantel celeste prepara xa o duelo do próximo sábado ante o invicto Valladolid
Así, o Leite Río Breogán non compite desde o pasado 18 de outubro –na primeira xornada con vitoria en Oviedo (64-78)– e, ademais, por un positivo en covid, non só non puideron adestrar desde o pasado 23 de outubro senón que os xogadores tiveron que permanecer en corentena nos seus respectivos domicilios.
Esta situación é oposta á do próximo rival –o sábado ás 20.00 horas no Pazo– dos breoganistas, o Clínica Sur-Aspasia Valladolid, que non só non viu alterado o seu calendario -xogou tres encontros por un do Breogán- senón que iniciou a competición nun gran estado de forma. O equipo de Hugo López non só gañou os tres encontros disputados, senón que ademais nas dúas últimas xornadas impuxéronse con certa claridade a outros dous dos aspirantes ao ascenso, o Coruña (67-80) e o Palencia (73-66).
Polo tanto, os homes de Diego Epifanio non só terán que preocuparse dun rival directo e que se atopa en plena forma, senón e, sobre todo, de recuperar ás alancadas o mellor ton físico posible para facer fronte ao líder con certas garantías. Desde logo, o novo preparador físico do Breogán, Rubén Portes, ten unha esixente estrea co equipo lucense.
Así, se se disputou menos do 50% da fase regular, a competición suspéndese ata que as autoridades autoricen a continuación. Neste caso a comisión delegada podería cambiar o sistema de competición e o calendario. Se a suspensión é superior aos dous meses a citada comisión delegada poderá proceder á cancelación da tempada, sen ascensos nin descensos.
Se se celebrou entre un 50% e un 70% (ou máis) da fase regular e a suspensión excede os dous meses, atenderase, para designar o ascenso e os descensos, á clasificación da última xornada disputada.
Se a suspensión da competición prodúcese durante a disputa dos play off de ascenso e non é posible renovalos, darase por finalizada a fase final e o ascenso producirase tendo en conta a clasificación da última xornada da fase regular.
En calquera destes casos de suspensión da liga, para determinar a clasificación final, en caso de empate entre dous ou máis equipos, terase en conta o basquetaverage xeral e non o particular como se realizará no caso de que chegue a bo termo.
