A LEB Ouro volve levantar o pano en Lugo. E de novo a mirada está enfocada cara arriba atisbando a liga ACB. Outra vez a ilusión de loitar por un retorno que, probablemente, se espera cun certo convencemento derivado de que xa se coñece un camiño que se percorreu hai moi pouco tempo.
Ademais, o inicio do Leche Río Breogán non puido ser máis esperanzador, cun encontro brillante no que non deu opción a un rival como o Tau. Este sábado (19.00 horas, Pazo dos Deportes), os breoganistas intentarán dar continuidade a tan positivo comezo, porque iso ratificaría que todo vai polo bo camiño. E é que os xogadores de Diego Epifanio non terán enfronte a un rival calquera. O Liberbank Oviedo será un opoñente incómodo, con calidade, pero tamén coa solidez suficiente como para facer fronte a calquera rival. Os asturianos xa o demostraron na primeira xornada derrotando ao, a priori, gran favorito da LEB, o B The Travel Brand Palma Mallorca. E, o máis significativo, deixou os baleares con só 61 puntos anotados.
E é que o Oviedo xa non é aquel equipo que durante varias tempadas exhibiu pola LEB unha grande ameaza desde a liña de 6,75 metros e que nunha boa tarde era capaz de esnaquizar calquera rival, pero que cando non vía aro se convertía nunha presa fácil. Hoxe, xa a pasada tempada ás ordes de Javi Rodríguez, o equipo ovetense ofrece moito máis como equipo. Xa non fía a súa sorte, nin moito menos, ao acerto. Hoxe os seus triunfos chegan a través dunha sólida defensa, moi activa, que complica aos seus rivais. En ataque busca máis opcións para romper o rival, aínda que hai que insistir, todo depende do traballo atrás.
E isto obrigará ao Leche Río Breogán a mostrar a súa mellor cara. A pesar do visto ante o Tau, é indubidable que aos xogadores de Diego Epifanio aínda lles queda moito traballo por diante para alcanzar o nivel ao que poden chegar e un equipo con bo traballo defensivo pode facer que se vexan as costuras, aínda non firmes, dos breoganistas.
O conxunto lucense ten, de todos os xeitos, argumentos tan sólidos ou máis que os do rival. O seu poderío físico, o ritmo, a intensidade e incluso o rebote deben de ser facetas nas que os breoganistas baseen as súas opcións de vitoria. Tamén cabe confiar nun maior acerto no lanzamento de tres puntos do mostrado na xornada inaugural.
Epifanio poderá dispoñer de todos os seus xogadores do mesmo xeito que Javi Rodríguez. O Oviedo mantén cinco xogadores da pasada tempada —os exbreoganistas Sergio Llorente e Oliver Arteaga, Víctor Pérez, Matti Nuutinen e Rolandas Jakstas— e incorporou tres xogadores que xa coñecen a competición como Álex Reyes —o mellor dos oventenses ante o Mallorca—, Devin Wright e o estadounidense Tree Coggins, que ten pasado no Clavijo de Logroño aínda que procede do BC Beroe, da liga búlgara.
Ademais, fichou a outros dous xogadores, Guim Expósito —base catalán que xogou a liga sueca a tempada pasada—, e ao islandés Gunner Olafsson. Os dous debutan na segunda competición do baloncesto español.
O Oviedo e o técnico galego aspiran a mellorar o realizado cun equipo de características distintas. "Posiblemente non sexamos tan talentosos como o ano pasado, pero somos máis polivalentes e máis físicos. Queremos facer un baloncesto dinámico e cunha defensa máis intensa que a do ano pasado. O traballo defensivo é parte fundamental da nosa filosofía", sinala.
O rival deste sábado do Leche Río Breogán empezou a tempada cun triunfo ante o Mallorca, algo que Javi Rodríguez cualifica de moi importante. "Dános confianza no noso traballo. Sabiamos que o encontro ante o Mallorca ía ser complicado porque dispoñen dun gran conxunto e foi un partido que preparamos moi ben, soubemos buscar as nosas opcións e xogar o noso partido", apunta.
Ante o encontro desta tarde, o que foi base internacional destaca o potencial do Breogán. "É, xunto co Palma, o mellor conxunto da competición. Haberá que ver como evoluciona cada un. O Breogán ten un persoal longo, con bos adestradores, a verdade é que o fixeron todo ben para estar arriba", di.
En canto ao que destaca do conxunto lucense, Javi Rodríguez teno claro: "Ten moitos bos xogadores, o que fai que as rotacións non se acusen e incluso que en partidos nos que algúns non estean ben o poidan resolver outros xogadores. Ademais, xogan ben e teñen moi claro ao que queren xogar".
O adestrador do Oviedo ten claro por onde pasan as opcións do seu equipo: "Debemos plantexar un partido no que deamos o máximo. Unha defensa moi sólida que faga que lles custe anotar, porque se os deixamos xogar, entón non teremos ningunha opción de levarnos o partido".
